Исроил Рафаҳга ҳужумларини давом эттиришга қарор қилди (видео)

ҲАМАС Қатар ва Миср томонидан тақдим этилган сулҳ таклифларини маъқуллаганини айтганига қарамай, Исроил ҳарбий Вазирлар Маҳкамаси Ғазо секторидаги кўчирилган фаластинликлар бошпана топган Рафаҳга ҳужумларни давом эттиришга қарор қилди. Бу ҳақда Исроил Бош вазири матбуот хизмати хабар берди.

Қайд этилишича, Рафаҳга ҳужумларни давом эттириш ҳақидаги бир овоздан қарор "исроиллик асирларни озод қилиш ва уруш мақсадларига эришишни мақсад қилган". Баёнотда айтилишича, ҲАМАС томонидан қабул қилинган таклиф Тель-Авив маъмуриятининг "шартларидан узоқ", бироқ Исроил маҳбусларни алмашиш келишувини муҳокама қилиш учун воситачилар билан учрашиш мақсадида Қоҳирага делегация юборади.

Бошқа томондан, гувоҳларнинг хабар беришича, Исроил ҳарбий самолётлари ва артиллерияси Рафаҳ шаҳрининг шарқий қисмини интенсив равишда бомбардимон қилган, чегара яқинида жойлашган ҳудудларда ҳарбий техника ҳаракати кузатилган.

АҚШ Президенти Жо Байден ва Исроил Бош вазири Биньямин Нетаньяху телефон орқали мулоқот қилиб, минтақадаги сўнгги воқеаларни муҳокама қилди. Суҳбатнинг асосий мавзуси Ғазодаги сўнгги вазият ва Исроилнинг Рафаҳга яқинлашаётган ҳужуми бўлди.

Президент Байден аввалги баёнотларида тахминан 1,5 миллион фаластинлик Рафаҳдан бошпана топганини қайд этган эди. Унинг сўзларига кўра, АҚШ ҳозирги шароитда Исроилнинг бу шаҳарга қуруқликдан ҳужумини қўллаб-қувватламайди.

Бошқа томондан, Нетаньяху амалдаги сулҳ битимининг натижаси қандай бўлишидан қатъи назар, яқинда Рафаҳга қуруқликдан ҳужум бошлашини эълон қилган.