Isroil Misr bilan chegarada yopiq harbiy zona tashkil qildi

Isroil Mudofaa vaziri Isroil Kats dronlar yordamida qurol kontrabandasining kuchayishiga qarshi kurashish maqsadida Isroil-Misr chegarasiga tutash hududni yopiq harbiy zona deb e’lon qilishni buyurdi. Bu haqda Isroilning 13-telekanali xabar berdi.

Vazir, shuningdek, “taqiqlangan hududga ruxsatsiz kirgan” har qanday shaxsga zarba berish imkonini beruvchi jangovar qoidalarni qayta ko‘rib chiqishga chaqirgan. Bundan tashqari, u Isroil xavfsizlik xizmati rahbari David Zini bilan dronlar orqali amalga oshirilayotgan kontrabandani terroristik tahdid sifatida baholash borasida kelishuvga erishgan.

“Kimki taqiqlangan hududga kirsa, yo‘q qilinadi”, deydi u.

Katsning fikricha, dronlar orqali qurol kontrabadasi G‘azo urushining bir qismi hisoblanadi.

“Bu bizning dushmanlarimizni qurollantirishga qaratilgan, shu sababli uni to‘xtatish uchun barcha choralarni ko‘rish zarur”, deydi vazir.

Eslatib o‘tamiz, avvalroq Isroil parlamenti terrorizm bilan bog‘liq qotilliklar bilan sudlangan falastinliklar uchun majburiy o‘lim jazosini qayta joriy etuvchi qonun loyihasini ilgari surayotgani haqida xabar berilgan edi.