Исроил Ғазода тақиқланган қуроллардан фойдаланган – БМТ вакили

БМТнинг босиб олинган Фаластин ҳудудларидаги инсон ҳуқуқлари бўйича махсус вакили Франческа Альбанезе Ғазо секторида геноцид содир этиляпти, деб ҳисоблайди. Бу ҳақда у Испаниянинг “El Pais” газетасига берган интервьюсида айтиб ўтди.

“Мен Жанубий Африканинг Халқаро суддаги профилактик чоралар кўриш ҳақидаги қарорини қўллаб-қувватлайман, чунки мен Ғазода геноцид содир этилиши эҳтимоли юқори деб ҳисоблайман. Уч ойлик бомбалаш оқибатларига қаранг. Ғазо каби аҳоли зич жойлашган ҳудудларда ишлатилмаслиги керак бўлган, тақиқланган қуроллардан фойдаланилди", дейди у.

"Жанубий Африканинг Исроилга қарши иши муваффақият қозониши мумкинми?" деган саволга, Альбанезе шундай жавоб берган: 

“Техник жиҳатдан мен "ҳа" деб айтардим, чунки улар вақтинчалик чоралар кўришни, шу жумладан, ўт очишни тўхтатишни талаб қилмоқда. Кейин суд Жанубий Африкада тўлиқ ҳужжатлаштирилган геноцид нияти билан ўлдириш, ҳалокат ва азоб-уқубатлар ўртасидаги боғлиқликни таҳлил қилиш учун вақт сарфлаши керак бўлади. Лекин сиёсий омиллар ҳам бор. Биз инсонмиз ва яшаётган муҳитимиз бизга таъсир қилади. Судьялар Ғазога бормайди ва терговчиларни юбормайди. Ғарбда эса Исроилнинг ҳаракатлари ўзини ҳимоя қилиш экани ҳақидаги версия тарқалишда ва кучайишда давом этмоқда”, дейди Франческа Альбанезе.

Маълумот учун, Жанубий Африка ҳукумати томонидан Гаагадаги Халқаро судга Исроил томонидан Геноцид жиноятининг олдини олиш ва жазолаш тўғрисидаги конвенцияни эҳтимолий бузганлиги муносабати билан даъво киритилган. Ҳужжатда таъкидланишича, Исроилнинг Ғазо секторидаги ҳаракатлари геноцид сифатида тавсифланиши мумкин, чунки "Ғазодаги фаластинликларни кенгроқ Фаластин миллий, ирқий ва этник гуруҳининг бир қисми сифатида йўқ қилиш" аниқ мақсадда амалга оширилмоқда. Жанубий Африка томони Исроил конвенция бўйича ўз мажбуриятларини бузаётгани ва Ғазо секторидаги барча ҳарбий ҳаракатларни тўхтатиб, товон пули тўлаши кераклиги ҳақидаги суд қарорини талаб қилмоқда.

Исроил томони бу айбловларни рад этиб, Жанубий Африканинг позициясини иккиюзламачилик деб атади ва суд мажлисида ишни кўриб чиқишдан олиб ташлашни сўради. Исроил Ташқи ишлар вазири Исраэль Кац Жанубий Африканинг ўзи Исроилда террорчи ташкилот ҳисобланган ва Ғазода ҳарбий операция олиб борилаётган ҲАМАСни қўллаб-қувватлаб, геноцид конвенциясини бузмоқда, деган фикрни билдирди.