Isroil aviahujumi oqibatida uch nafar falastinlik halok bo‘ldi

G‘azo sektori markazidagi Deyr al-Balah shahriga Isroil tomonidan amalga oshirilgan aviahujum oqibatida uch nafar falastinlik, jumladan bir nafar bola halok bo‘ldi. Bu haqda kecha, 29 iyun kuni G‘azo Sog‘liqni saqlash vazirligi xabar qildi.

Ma’lumotlarga ko‘ra, hujum mahalliy vaqt bilan 29 iyun kuni soat 09:30 atrofida amalga oshirilgan. Isroil harbiylari havo zarbasi berilganini tasdiqlagan, ammo operatsiya tafsilotlari haqida qo‘shimcha ma’lumot bermagan. G‘azo Sog‘liqni saqlash vazirligi Deyr al-Balah shahri HAMAS nazoratidagi hudud ekanini bildirgan. Isroil esa G‘azo sektorining taxminan 60 foizini nazorat qilib turibdi.

Vazirlik ma’lumotiga ko‘ra, 27 iyun kunidan buyon Isroil harbiylari amalga oshirgan hujumlar oqibatida 12 nafar falastinlik halok bo‘lgan. Ular orasida sakkiz nafar erkak va to‘rt nafar bola bor. Shuningdek, Falastin Sog‘liqni saqlash vazirligi Isroil tomonidan bosib olingan G‘arbiy sohildagi Al-Bira shahrida reyd vaqtida bir nafar falastinlik o‘smir otib o‘ldirilganini ma’lum qilgan.

Isroil armiyasi mazkur voqea o‘rganilayotganini bildirib, harbiylar ularga tosh otgan gumonlanuvchiga qarshi o‘q uzganini qayd etgan. Isroil o‘tgan yil oktyabr oyida AQSH vositachiligida HAMAS bilan erishilgan o‘t ochishni to‘xtatish kelishuvidan keyin ham G‘azoda bir necha bor havo hujumlarini amalga oshirgan.

Keltirilgan ma’lumotlarga ko‘ra, o‘t ochishni to‘xtatish rejimi kuchga kirgan sakkiz oy davomida G‘azoda 1045 nafar falastinlik va to‘rt nafar isroillik harbiy halok bo‘lgan. 

Eslatib o‘tamiz, avvalroq BMTning Mustaqil xalqaro tergov komissiyasi Isroil hukumatini G‘azoda falastinlik bolalarni ataylab nishonga olgan hamda ushbu harakatlar genotsid, insoniyatga qarshi jinoyatlar va harbiy jinoyatlar alomatlarini ko‘rsatadi deb baholangan edi.