Исроил ҳарбийлари 2 ёшли фаластинлик қизчани отиб ўлдирди

Исроил кучлари босиб олинган Ғарбий Соҳилда икки ёшли фаластинлик қизни отиб ўлдирди. Бу ҳақда “Al-Jazeera” хабар берди.

Қайд этилишича, Лаила ал-Хатиб исмли қиз жорий йилнинг 25 январь куни бошига ўқ узилганидан сўнг вафот этган. Қизнинг ҳомиладор онаси ҳам ҳужумда енгил жароҳат олгани айтилмоқда.

Исроил ҳарбийлари воқеани текшираётганини, фаластинлик жангчилар борлиги ҳақида маълумот олишгач, бинога ўт очилганини иддао қилган.

Ал-Хатибнинг бувисига кўра, воқеа содир бўлганида оила кечки овқат қилаётган бўлган.

“Отишмалар бўлди ва деразалар синди. Қизлар ўқ овозларини эшитгач, ичкарига югура бошлади. Онаси уни овқатлантираётганда снайпер ўқи унинг бошига тегди”, дейди у ва қиз онасининг ягона фарзанди эканини қўшимча қилди.

Маълумот учун, Исроил армияси сўнгги йилларда Фаластин қаршилигининг рамзи сифатида қаралган Женинда бир неча марта рейдлар ва босқинлар ўтказди. Унинг сўнгги операцияси Ғазо секторида ўт очишни тўхтатиш кучга кирганидан бир кун ўтиб бошланди. Секторда тахминан 15 ой давом этган Исроил ҳужумлари оқибатида 47 мингдан ортиқ фаластинлик ҳалок бўлганди.

Фаластин Соғлиқни сақлаш вазирлигига кўра, Женин ва унга туташ қочқинлар лагерида давом этаётган ҳарбий амалиёт камида 14 фаластинликнинг ҳаётига зомин бўлган. Ўнлаб одамлар яраланди, минглаб одамлар уй-жойларини тарк этишга мажбур бўлди.

Исроил армиясининг рейдлари кўплаб одамларнинг қурбон бўлишидан ташқари, асосий йўлларни булдозерлаш ва уйларни бузиш каби кенг вайронагарчиликларга олиб келди.