Ислом Махачев реванш жангида Волкановскини нокаутга учратди

Кеча, 21 октябрь куни тунда Бирлашган Араб Амирликлари пойтахти Абу-Дабида UFC’нинг навбатдаги рақамланган турнири бўлиб ўтди. Кечанинг марказий жангида россиялик Ислом Махачев австралиялик Александр Волкановскидан ўзига тегишли чемпионлик камарини ҳимоя қилди. 

Махачев 5 раундга мўлжалланган жангнинг 1-раундидаёқ Волкановскини нокаутга учратди ва кетма-кет иккинчи жангда австралиялик чемпион устидан ғалабага эришди.

Улар ўртасидаги биринчи жанг шу йилнинг 11 февраль куни бўлиб ўтган эди. Ўшанда Махачев очколар бўйича устун келгани боис Волкановски ҳакамлар қароридан норози бўлганди. UFC эса барчасини инобатга олган ҳолда реванш жангни ташкил қилади.

Ислом Махачев кеча қўлга киритган ғалабасидан сўнг уни байрам қилиб нишонлай олмаслигини айтиб, ҳозирда Исроил мудофаа кучларининг ҳужумидан азият чекаётган фаластинлик тинч аҳолига ҳамдардлик билдирди. 

“Дунёда содир бўлаётган даҳшатли воқеалар сабабли бугунги ғалабамни нишонлай олмайман. Буни тўхтатинг! Фаластинни қўллаб-қувватлаймиз, Ғазо сектори биз сен билан”, деди спортчи.

Иккинчи даражали марказий жангда Ҳамзат Чимаев ва Камару Усмон ўзаро тўқнаш келди. Уч раундга мўлжалланган жанг тўлиқ давом этиб, унда ҳакамлар Чимаевнинг ғалаба қозонганини қайд этди. Шу тариқа, Чимаев ғалабали сериясини давом эттирди. Ҳозирда унинг ҳисобида 14 та мағлубиятсиз жанг бор.

Абу-Дабида бўлиб ўтган UFC 294 турнирининг қолган барча натижалари:

• Муҳаммад Анкалаев (Россия) – Жонни Уокер (Бразилия) ўртасидаги ҳанг ўтказилмаган деб топилди;

• Икром Алискеров (Россия) Ворли Алвес (Бразилия) устидан 1-раунддаги техник нокаут эвазига ғалаба қозонди;

• Саид Нурмуҳаммедов (Россия) Муин Гафуров (Тожикистон)ни 1-раундда бўғиш усули билан ютди;

• Мухаммад Мокаев (Буюк Британия) Тим Эллиот (АҚШ)ни 3-раундда сабмишен орқали таслим қилди;

• Мухаммад Яҳё (БАА) Тревор Пик (АҚШ)ка ҳакамларнинг якдил қарори билан ютқазди;

• Жавид Башарат (Буюк Британия) Виктор Генри (АҚШ) ўртасидаги жанг ўтказилмаган деб топилди;

• Седрик Думас (АҚШ) Абу Азайтар (Марокаш)дан ҳакамларнинг якдил қарори билан устун келди;

• Майк Бриден (АҚШ) Аншул Жубри (Ҳиндистон)ни 3-раундда нокаутга учратди;

• Натаниэль Вуд (Буюк Британия) ҳакамларнинг қарори билан Муҳаммад Наимов (Тожикистон)га ютқазиб қўйди;

• Виктория Дудакова (Россия) Жин Ю Фрей (АҚШ) устидан очколар ҳисобида ғалабага эришди;

• Шарабутдин Муҳаммадов (Россия) ҳакамларнинг якдил қарори билан Бруну Силва (Бразилия)ни мағлуб этди.