Иордания ва БАА Ғазога ҳаводан ёрдам етказа бошлади (видео)

Исроил блокадаси сабаб бўлган очарчилик фонида Бирлашган Араб Амирликлари ва Иордания Ғазога ҳаводан ёрдам юборишни бошлади. Бу ҳақда Исроилнинг KAN давлат телевидениеси хабар берди. 

Қайд этилишича, БАА ва Иордания самолётлари парашютлар орқали Ғазо шаҳрига саккиз қути ёрдам ташлаган. Таъкидланишича, бу қутиларнинг тўрттаси Ғазонинг Эски шаҳар ҳудудига, яна тўрттаси шаҳар шимолидаги Зайтун маҳалласига ташланган.

Исроил армияси аввалроқ 25 июлдан кунидан бошлаб хорижий давлатларга Ғазо секторига инсонпарварлик ёрдамларини ҳаводан олиб ўтишга рухсат беришини айтган эди. Аввалроқ хабарларга кўра, ҳаводан ёрдам юборилиши тинч аҳолининг ўлимига сабаб бўлган, чунки қутилар тўғридан тўғри одамлар устига тушган.

Таъминотнинг бир қисми денгизга тушиб, очликдан азоб чекаётган аҳолини қирғоққа қочишга мажбур қилди, бу ёрдамни етказиб бериш усули танқидларга сабаб бўлди. Ғазо секторида Исроил блокадаси сабаб бўлган гуманитар инқироз оқибатида очликдан ҳалок бўлган фаластинликлар сони 133 нафарга етди.