Илҳом Алиев хитойлик журналистга Озарбайжон финжонини мақтади (видео)

Озарбайжон Президенти Илҳом Алиев Хитойнинг CGTN (China Global Television Network) телеканалига берган интервьюсида озарбайжон чойига бағишланган қизиқарли суҳбат ўтказди.

Хитойга сафари чоғида Илҳом Алиев Хитой оммавий ахборот воситаларидан бирига интервью берар экан, давлат етакчисини саволга тутаётган журналист Озарбайжон чойини илк бор ичаётганини, чой қуйилган финжон ҳам бежирим эканини айтган. Бунга жавобан Алиев миллий финжонни таърифлаб кетган.

“Бу бизнинг миллий финжон. Чойни иссиқ сақлайди, чунки биз одатда иссиқ чой ичамиз”, деган Озарбайжон етакчиси.

Шу ўринда Алиев Хитойда чой жуда иссиқ берилмаслигини пайқаганини айтиб, нашр вакилидан бу қанчалик рост эканини сўраган. Журналист эса қуйидагича жавоб берган:

“Меҳмон бўлганингиз учун улар сизни хафа қилишни хоҳламайди. Шунинг учун улар жуда хушмуомала ва эҳтиёткор”, деган у.

Эслатиб ўтамиз, жорий йилнинг 22 апрель куни Озарбайжон Республикаси Президенти Илҳом Алиев давлат ташрифи билан Хитой Халқ Республикасига борганди. Хитойга бола-чақаси билан борган Алиевнинг Пекин сафарига рафиқаси Меҳрибон Алиевадан ташқари, қизи Лейла Алиева ҳамда набиралари Микойил ва Али ҳам ҳамроҳлик қилганди. 23 апрель куни Пекин шаҳрида Алиев ва Хитой Раиси Си Цзиньпин ўртасида учрашув бўлиб ўтганди.