Икки давлатнинг Ўзбекистондаги янги элчилари тайинланди

Кеча, 18 март куни Ташқи ишлар вазири Абдулазиз Комилов Корея Республикасининг Ўзбекистондаги Фавқулодда ва Мухтор элчиси этиб тайинланган Ким Хи Сангни қабул қилди.

ТИВ хабарига кўра, ишонч ёрлиғи нусхасини топшириш маросимидан сўнг вазир элчини Ўзбекистонга тайинлангани муносабати билан табриклаб, юксак ва масъулиятли фаолиятида муваффақиятлар тилади.

Суҳбат чоғида томонларни қизиқтирган соҳаларда Ўзбекистон-Жанубий Корея махсус стратегик шериклигининг долзарб масалалари муҳокама қилинди. Дипломатик муносабатлар ўрнатилганининг 30 йиллиги ва Ўзбекистонда корейс диаспораси ташкил топганининг 85 йиллигини нишонлаш бўйича “Ўзаро алмашинув йили” доирасида бўлиб ўтадиган тадбирлар жадвали кўриб чиқилди.

Шунингдек, вазир Комилов Доминикана Республикасининг Ўзбекистондаги Фавқулодда ва Мухтор элчиси (қароргоҳи Москва шаҳрида) этиб тайинланган Франк Кастелланосни қабул қилди.

Комилов Ишонч ёрлиғини қабул қилиб олиб, элчини лавозимга киришиши билан табриклади ва масъулиятли вазифада муваффақиятлар тилади. Суҳбат чоғида томонлар ўртасида БМТ ва Америка давлатлари ташкилоти доирасидаги ҳамкорликни давом эттириш бўйича келишувга эришилди.