ИИВ қўлга олинган блогер бўйича фикр билдираётганларни қаттиқ огоҳлантирди

Жамият 24433
image

Сўнгги кунларда Сурхондарё вилояти Термиз шаҳрида яшаб, блогерлик билан шуғулланувчи фуқаро Отабек Сатторийга нисбатан қўзғатилган жиноят ишига тааллуқли маълумотлар жамоатчилик томонидан кенг муҳокама қилинмоқда. Ўзбекистон Республикаси Ички ишлар вазирлиги ҳолат юзасидан расмий мурожаат билан чиқди.

Вазирлик Матбуот хизматиг кўра, мазкур жиноят иши юзасидан Ўзбекистон Республикасининг “Давлат ҳокимияти ва бошқаруви органлари фаолиятининг очиқлиги тўғрисида”ги қонунига мувофиқ расмий ахборот берилганига қарамасдан, мамлакат ва хорижий ижтимоий тармоқларнинг фаоллари томонидан турли миш-мишларни тарқатиш, давлат идораларининг ваколатлари ва ҳаракатларини шубҳа остига қўйиш, уларни обрўсизлантиришга қаратилган хабарларни кўпайтириш, масаланинг моҳиятини тушунмасдан туриб оммани чалғитиш ва бошқа қонунбузарлик ҳолатлари такрорланиб келмоқда.

Баёнотда эслатилишича, Ўзбекистон Республикасининг “Жамоатчилик назорати тўғрисида”ги қонунига мувофиқ жамоатчилик назорати субъектларининг давлат органлари, уларнинг мансабдор шахслари фаолиятига асоссиз аралашувига ва уларга ғайриқонуний таъсир кўрсатишига йўл қўйилмайди, шунингдек, Ўзбекистон Республикасининг “Оммавий ахборот воситалари тўғрисида”ги қонуни билан тергов органларининг материалларини эълон қилиш, муайян иш бўйича суд қарори чиқмасдан туриб, унинг натижаларини тахмин қилиш ёхуд судга бошқача йўл билан таъсир кўрсатиш қатъиян тақиқланган.

Жиноят процесси иштирокчисини қўлга олиш билан боғлиқ ҳаракатлар эса, ўз навбатида, Ўзбекистон Республикасининг “Ички ишлар органлари тўғрисида”ги қонунининг 22-моддаси билан тартибга солинади.

Вазирликка кўра, жтимоий тармоқларнинг фаоллари томонидан жиноят иши билан боғлиқ текширилмаган ахборотни жамоатчиликка тарқатиш орқали бирор-бир мақсадга эришишга ҳаракат қилиш, тергов ва суд органларининг фаолиятига нисбатан сунъий равишда салбий муносабат шакллантириш – тергов қилишга ёки суд ишларини ҳал этишга аралашиш, деб баҳоланади ва жиноий жавобгарликни келтириб чиқаради.

Тергов ва суд органлари ўзининг ваколат доирасидаги фаолиятини, жумладан муҳокама этилаётган ҳолат юзасидан, айбсизлик презумпциясига тўла риоя этган ҳолда ҳамда жамоатчилик олдидаги мажбуриятидан келиб чиқиб олиб боради.

ИИВ Қонун устуворлиги ҳақида бонг ураётган ижтимоий тармоқ фаолларидан мамлакат қонунчилигини ҳурмат қилишларини талаб қилган.

Умиджон Нозимжонов
Мақолага баҳо беринг
Баҳолаганлар: 994
Рейтинг: 2.9
t
×