Грузия “авторитар йўналиши” сақланиб қолар экан, ЕИга аъзо бўлолмайди – Европарламент

Грузия ҳукуматининг “авторитар йўналиши” сақланиб қолар экан, мамлакат Европа Иттифоқига аъзо бўлолмайди. Бу ҳақда Европарламентнинг X ижтимоий тармоғида хабар берилди.

Уларнинг баёнотида айтилишича, Европарламент ҳозирги Грузия ҳукуматини қонуний деб тан олмайди ва мамлакатда ҳалол сайловлар ўтказилмагунча ЕИга қўшилиш жараёни музлатилган бўлади. 

“Европарламент Грузия халқини қўллаб-қувватлайди. Парламент Грузия ҳукуматини тан олмайди ва ЕИга аъзолик жараёни тўхтатилганини билдиради”, дейилади хабарда.

Бундан аввалроқ Европарламент томонидан қабул қилинган резолюцияда 2024 йил октябрь ойидаги парламент сайловлари сохталаштирилгани айтилди. 

“Ушбу сайловлар Грузияда авторитар бошқарувнинг бошланиш нуқтаси бўлди”, дейилади ҳужжатда. 

2024 йилги сайловларда “Грузин орзуси” партияси 53,92 фоиз овоз билан ғалаба қозонди. Бироқ мухолифат натижаларни тан олмади. Ўша пайтда президент лавозимида бўлган Саломе Зурабишвили янги парламентни “ноқонуний” деб атади ва янги сайловларгача ваколатини топширмаслигини маълум қилди. 2024 йилнинг декабрь ойида Грузиянинг янги Президенти этиб Михаил Кавелашвили сайланди, Зурабишвили эса резиденцияни тарк этди.

Маълумот учун, Грузия 2022 йил март ойида Украина ва Молдова ортидан ЕИга аъзолик учун ариза топширган. Украина ва Молдова шу йилнинг июнида номзод мақомини олган бўлса, Грузия бу мақомни фақат 2023 йил декабрда олган. Еврокомиссия Грузияга иттифоққа аъзо бўлиш учун бажарилиши лозим бўлган 9 банддан иборат талаблар тўпламини тақдим этган эди. Улар орасида сиёсий қарама-қаршиликни камайтириш, мухолифатни сиёсий жараёнга жалб қилиш ҳамда эркин ва адолатли сайловларни таъминлаш бўйича мажбуриятлар мавжуд.

Эслатиб ўтамиз, аввалроқ Европа Иттифоқи ва Европа Иттифоқига аъзо давлатлар ҳукуматларини мамлакатдаги демократия ва инсон ҳуқуқлари билан боғлиқ вазият парламент сайловларидан кейин янада ёмонлашгани сабабли Грузия ҳукуматига нисбатан энг қаттиқ чораларни кўришга чақирганди. Европа парламенти, шунингдек, Грузиядаги давлат лойиҳаларини қўллаб-қувватлаш учун мўлжалланган 120 миллион еврони Грузия фуқаролик жамияти ва мустақил оммавий ахборот воситаларини қўллаб-қувватлашга ўтказишга чақирган.