Google Нетаньяху билан Исроил пропагандасини тарқатишга келишган – ОАВ

Google Исроил ҳукумати хабарларини тарғиб қилиш ва Ғазодаги гуманитар инқироз ёритилишини камайтириш учун Исроил Бош вазири Биньямин Нетаньяхунинг идораси билан олти ойлик 45 миллион долларлик шартнома тузган. Бу ҳақда 3 сентябрь куни “Drop Site News” хабар берди.

Агентлик хабарига кўра, июнь охирида имзоланган шартномада Google Нетаньяхунинг жамоатчилик билан алоқалар стратегиясини қўллаб-қувватловчи “асосий ташкилот” сифатида тасвирланган. Кампания 2 март куни Исроил озиқ-овқат, дори-дармон, ёқилғи ва бошқа гуманитар юкларнинг Ғазога киришини тўсиб қўйганидан бир неча кун ўтиб бошланган.

Исроилдаги қонунчилар ўшанда расмийларга ҳукумат жамоатчилик билан алоқалар бузилишига тайёрми ёки йўқми, деган саволни берган. Исроил армияси матбуот котиби эса расмийлар “очлик йўқлигини тушунтириш ва маълумотларни тақдим этиш учун” рақамли кампанияни бошлаши мумкинлигини айтган.

Шундан бери Ғазода очарчиликни инкор этувчи ҳукумат рекламалари кенг тарқалди, жумладан Исроил Ташқи ишлар вазирлигининг YouTube'даги “Ғазода озиқ-овқат бор. Бошқа ҳар қандай даъво ёлғондир”, деган ролики 6 миллион мартадан кўпроқ кўрилган, унинг кўп қисми пулли реклама орқали кўпайган.

Ҳисоботга кўра, рекламалар YouTube ва Google'нинг Display & Video 360 платформаси орқали бошқарилади ва ҳукумат ҳужжатларида “ҳасбара” (ибронийча атама, маъноси “тарғибот”) деб кўрсатилган. Ёзувлар шуни кўрсатадики, Исроил АҚШнинг Х ижтимоий медиа компанияси рекламалари учун ҳам 3 миллион доллар ва Outbrain/Teads француз-исроил платформаси учун 2,1 миллион доллар сарфлаган.

Ғазо Соғлиқни сақлаш вазирлиги маълум қилишича, август ойида 185 киши, жумладан 12 бола очликдан ўлган, бу Исроилнинг анклавга қарши уруши деярли икки йил аввал бошланганидан бери қайд этилган энг юқори ойлик кўрсаткичдир. Ўлимларнинг 70 нафари БМТ қўллаб-қувватлаган очлик мониторинги тизими Интеграциялашган озиқ-овқат хавфсизлиги фаза таснифи ўтган ой Ғазони очарчилик зонаси деб эълон қилганидан кейин содир бўлган. Соғлиқни сақлаш ходимларининг маълум қилишича, 5 ёшгача бўлган 43 мингдан ортиқ бола, 55 минг ҳомиладор ва эмизикли аёллар тўйиб овқатланмасликдан азият чекмоқда.