Гиналар унутилмоқда. Саудия ва Эрон алоқаларни тикламоқда

Эрон ва Саудия Арабистони дипломатик алоқаларини тикламоқда ва икки давлатнинг элчихоналари ҳам қайта очилмоқда. Бу ҳақда кеча, 15 январь куни Эрон парламенти аъзоси маълум қилган.

Эрон парламентидаги Миллий хавфсизлик ва ташқи сиёсат қўмитаси аъзоси Жалил Раҳимий Жаҳонободий Twitter’да Эрон ва Саудия Арабистони 2016 йилда узилган дипломатик алоқаларни тиклашга ҳозирлик кўраётганини билдирган.

Жаҳонободийнинг айтишича, минтақавий рақиблар ўртасидаги муносабатларнинг яхшиланиши “Ислом оламининг бирлашиши ва ривожланиши”да катта роль ўйнайди.

У Эроннинг хавфсизлик кучлари ва оммавий ахборот воситаларини Исроилнинг Теҳрон ва Ар-Риёд ўртасидаги алоқаларни бузишга уриниши мумкин бўлган ҳаракатларидан эҳтиёт бўлишга чақирган.

“Икки муҳим давлат – Эрон ва Саудия Арабистони муносабатлари қайта тикланмоқда ва элчихоналар қайта очилишга тайёрланмоқда. Бу қадам минтақавий тарангликни юмшатиш ва мусулмон дунёсида бирдамликни оширишда муҳим таъсир кўрсатади. Хавфсизлик ташкилотлари ва оммавий ахборот воситалари сионистлар ёвузлиги ва экстремистларнинг аҳмоқлигидан эҳтиёт бўлишлари керак”, деган у Twitter’да.

Минтақадаги сунний ва шиа мусулмонларининг қудратли давлатлари саналган Саудия Арабистони ва Эрон 2021 йил охиридан бошлаб тўғридан-тўғри дипломатик музокараларни қайта йўлга қўйган эди.

Бундан аввал БМТ аралашуви билан тугатилган Ямандаги урушларда бу икки давлатнинг манфаатлари тўқнаш келиши оқибатида ўртадаги алоқалар мустаҳкамлигига путур етганди.

Икки давлат муносабатлари узилишига яна бир катта сабаб Ливандаги нотинчликларда Эроннинг “Ҳизбуллоҳ”ни қўллаб-қувватлаб чиққани бўлган.

Яқин-яқиндан бошлаб расмий Теҳрон икки давлат ўртасида дипломатик музокаралар бошлангани ҳақида оммага маълум қилиб келмоқда, аммо расмий Ар-Риёд ҳозирча бу ҳақида ҳеч қандай маълумот берганича йўқ.

Беҳруз Саидов