Германияликлар ЖЧни бойкот қилишга тайёр – ОАВ

INSA институти томонидан ўтказилган сўров натижаларига кўра, агар Вашингтон Гренландияни ҳарбий йўл билан эгаллашга қарор қилса, германияликларларнинг катта қисми АҚШда бўлиб ўтадиган Жаҳон чемпионатини мамлакат томонидан бойкот қилинишини қўллаб-қувватлайди. Бу ҳақда “Bild” нашри хабар берди.

Сўровда қатнашганларнинг 47 фоизи АҚШ оролни ҳарбий йўл билан эгаллаган тақдирда Германия бўлажак турнирни бойкот қилиши керак, деб ҳисоблаган. 35 фоиз респондент бунга қарши эканини билдирган, 18 фоизи эса аниқ қарорга келмаган.

Жорий йилнинг 16 январь куни Германия Бундестагидаги Христиан-демократик ва Христиан-социал иттифоқи (CDU/CSU) фракциясининг ташқи сиёсат бўйича вакили Юрген Хардт АҚШнинг Гренландияга бўлган даъволари фонида Жаҳон чемпионатини бойкот қилиш масаласини муҳокама қилишни ҳаддан ташқари кескин чора деб баҳолаган.

Маълумот учун, 2026 йилги Жаҳон чемпионати тарихда илк бор 48 та миллий терма жамоа иштирокида ўтказилади. Мусобақа АҚШ, Мексика ва Канада мезбонлигида бўлиб ўтади ҳамда 11 июндан 19 июлгача давом этади. Шунингдек, Лос-Анжелес 2028 йилги ёзги Олимпия ўйинларига мезбонлик қилади.

Эслатиб ўтамиз, аввалроқ АҚШ сиёсатига норозилик сифатида турнирни бойкот қилиш чақириқларидан сўнг, қарийб 17 минг нафар мухлис Жаҳон чемпионати чипталарини бир кеча ичида бекор қилгани ҳақида хабар берилган эди.