Германияда G7 давлатлари ташқи ишлар вазирларининг учрашуви бошланди

Бугун, 18 февраль куни Германиянинг Мюнхен шаҳрида хавфсизлик бўйича Мюнхен конференцияси доирасида G7 (Катта еттилик) давлатлари ташқи ишлар вазирларининг учрашуви бошланди. Бу ҳақда ТАСС хабар берди.

Қайд этилишича, музокараларнинг асосий мавзулари Украинадаги уруш, НАТО келажаги ва Осиёдаги вазият бўлиши кутилмоқда. Бу Япония раислигида жорий йилдаги G7 ташқи ишлар вазирларининг биринчи йиғилиши бўлади.

Япония ташқи ишлар вазири Ёсимаса Хаяши 16 февраль куни тадбир иштирокчилари “катта еттилик қонун устуворлигига асосланган жаҳон тартибини сақлаш қатъиятини яна бир бор тасдиқлашни” режалаштирганини айтганди. Шунингдек, у учрашувга украиналик ҳамкасби Дмитрий Кулебани ҳам таклиф этиш ниятида эканлигини таъкидлаган.

Маълумот учун, Япония бу йил G7’га раислик қилади ва май ойида Хиросимада саммитга мезбонлик қилади. Бу шаҳар Нагасаки билан бирга дунёдаги ядро қуролидан фойдаланилган ягона жой саналади. Унга 1945 йил 6 августда АҚШ томонидан ядро бомбаси ташланган.

Алибек Бейжанов