Генерал Суровикинга “дам берилди”

Генерал Сергей Суровикин Россия Федерацияси Аэрокосмик кучлари қўмондони лавозимидан озод этилди. Бу ҳақда манбаларига таяниб, РБК хабар берди. 

Айтилишича, Суровикин “бошқа ишга ўтганлиги муносабати билан” эгаллаб турган лавозимидан озод этилган бўлиб, у ҳозирда "таътилда".

“Эхо Москви” газетасининг собиқ бош муҳаррири Алексей Венедиктовнинг ёзишича, Россия Президенти фармони билан Суровикин истеъфога чиққан. Унга кўра, генерал Россия Мудофаа вазирлиги ихтиёрида қолган. Фармоннинг ўзи ҳали расман эълон қилинмаган.

“Кровавая барыня”нинг ёзишича, Суровикин 18 август куни ёпиқ фармон билан ўз лавозимидан четлаштирилган. Айни пайтда оиласи у билан боғлана олмаяпти.

“Важные истории” канали эса Путиннинг ушбу саналар бўйича давлат фармонларини рақамлашда бўш жой борлигини маълум қилган. 17 августда Путин "Россия Федерациясининг илмий ва технологик ривожланиши прогнозини ишлаб чиқиш ва тузатиш тартиби тўғрисида" ги 622-сонли фармонни, 18 августда эса 624-сонли "14-қирувчи авиация полкига фахрий ном бериш тўғрисида"ги фармонни имзолаган.

"Агар Собчакнинг маълумотлари тўғри бўлса, Суровикинни четлатиш ҳақидаги фармон 623-рақам остида яширинган бўлиши мумкин", деб ёзади журналистлар.

“Рибарь” каналининг ёзишича, генерал “Вагнер” раҳбари Евгений Пригожиннинг қўзғолонидан сўнг дарҳол лавозимидан четлатилган, аммо расмий фармон фақат ҳозир чиқарилган. Аввалига Суровикин Лефортовода "сўроқ қилиш учун" ушлаб турилган, ҳозир унинг қаерда экани номаълум.

РИА Новости манбаси ҳам генерал Сергей Суровикин Россия Аэрокосмик кучлари бош қўмондони лавозимидан озод этилганини тасдиқлаган.

“Аэрокосмик кучлар Бош штаби бошлиғи, генерал-полковник Виктор Афзалов вақтинча Аэрокосмик кучлар бош қўмондони вазифасини бажариб келмоқда”, деган манба.

Афзалов 2018 йил август ойидан буён Россия Аэрокосмик кучлари бош штаб бошлиғи лавозимида ишлаб келаётган эди. Маълумотларга кўра, Суровикин Украинага бостириб киришда қатнашган қўшинлар бирлашган гуруҳини бошқарганидаёқ Афзалов Аэрокосмик кучлар қўмондони вазифасини бажарувчи бўлган.

Сергей Суровикин ким ва у нима қилди?

Суровикин 2017 йил октябрь ойида Россия Аэрокосмик кучлари қўмондони этиб тайинланган. У илгари армияда хизмат қилган ва учувчи сифатида ҳеч қачон самолётда учмаган. 2019 йилнинг январидан апрелигача генерал Суриядаги Россия гуруҳига қўмондонлик қилган. Суровикин у ерда "Генерал Армагеддон" лақабини олган. Журналистларнинг фикрига кўра, у қаттиққўл ва талабчан ҳарбий раҳбар обрўси туфайли бундай таърифга эга бўлган.

2022 йил 8 октябрдан Суровикин Украинадаги бирлашган кучлар гуруҳини бошқарган, аммо 2023 йил 11 январдан бошлаб у қўмондоннинг биринчи ўринбосари лавозимига туширилган. 

Сергей Суровикин қачон ва нима учун ғойиб бўлди?

2023 йил 24 июнда “Вагнер” жангчилари исён кўтаришга уриниб, Ростов вилоятидаги бир нечта объектларни назорат остига олган. Суровикин қўзғалончиларнинг ҳаракатларини қоралаб, уларни “президент иродасига бўйсунишга ва масалани тинч йўл билан ҳал қилишга” чақирган. “The New York Times” газетасининг ёзишича, генерал яқинлашиб келаётган қўзғолон ҳақида билган ва уни қораланганига қарамай, ҳатто қўзғолон ташкилотчиларига ёрдам берган. Айтилишича, баъзи қўмондонлар Мудофаа вазирлиги раҳбариятини ўзгартириш фитнасининг бир қисми бўлишга рози бўлган. Ушбу маълумотлар расман тасдиқланмаган.

Россияда ва Ғарбда Суровикин ғойиб бўлиши мумкин бўлган турли хил версиялар илгари сурилган. “Financial Times” газетасининг уч манбага таяниб ёзишича, генерал сўроқ учун ҳибсга олинган, бироқ унга қандай айбловлар қўйилиши аниқ эмас. 
Июль ойида Москва Жамоатчилик Кузатув Комиссияси Суровикин на Матросская Тишинада, на Кремль марказида бўлмагани ҳақида хабар берган. Генералнинг қизи ҳам отасининг ҳибсга олинганини рад этган. “Реадовка” хабарига кўра, ўша пайтда Россия Аэрокосмик кучлари бош қўмондони Ростовда таътилда бўлган.

Эслатиб ўтамиз, Пригожиннинг бир кунлик исёнидан кўп ўтмай, июнь ойи охирида генерал Сергей Суровикин ҳибсга олингани айтилганди.