G‘azoda yordam mashinasi ag‘darilib ketdi. 20 kishi halok bo‘ldi

north_east

G‘azoga ocharchilik yaqinlashmoqda (fotoreportaj)

G‘azo sektorida oziq-ovqat yuklarini olib ketayotgan gumanitar yuk mashinasining ag‘darilib ketishi oqibatida 20 falastinlik halok bo‘ldi. Hodisa davom etayotgan gumanitar blokada vaqtida yuz bergan. Bu haqda “Anadolu” xabar berdi.

Qayd etilishicha, Isroil armiyasi insonparvarlik yordamiga kirishni cheklashda davom etmoqda va bu bilan insonparvarlik inqirozini yanada kuchaytirmoqda. Xususan, Isroil qasddan cheklangan miqdordagi yordam yuk mashinalarini ochlikdan azob chekayotgan falastinliklar to‘planib qolgan hududlarga jo‘natib, ularni xavf ostiga qo‘ygani aytilmoqda.

“Isroil ishg‘olining bosimi ostida, ataylab yaratilgan tartibsizlik sharoitida Dayr al-Balah hududida, ilgari bombalangan va o‘tish qiyin bo‘lgan yo‘l bo‘ylab gumanitar yuk mashinasi jo‘natildi. Avtomashina oziq-ovqat olishga urinayotgan falastinliklar ustiga ag‘darilib ketdi. Fojia oqibatida 20 kishi halok bo‘ldi, o‘nlab kishilar jarohat oldi”,  deyiladi G‘azo hukumati bayonotida.

G‘azo ma’muriyatining ta’kidlashicha, Isroil “ommaviy ocharchilik jinoyatini sodir etish” orqali 2,1 million kishining hayotini xavf ostiga qo‘ygan va oziq-ovqat, dori-darmon va zaruriy buyumlar yetkazib berishga to‘sqinlik qilishda davom etmoqda. Xalqaro hamjamiyat “barcha qizil chiziqlarni kesib o‘tgan” insoniylik falokatining kuchayishi fonida “jinoiy sukunat”ni saqlab qolayotgani alohida ta’kidlandi. G‘azo hukumati BMT va xalqaro inson huquqlari tashkilotlarini Isroil jinoyatlarini to‘xtatish, gumanitar yordamning to‘siqsiz va so‘zsiz kirishini ta’minlash, barqaror va xavfsiz asosda chegara o‘tish joylarini ochish uchun zudlik bilan aralashishga chaqirdi.

“Harakatsizlik, sukut saqlash yoki sodir bo‘layotgan voqealarga e’tibor bermaslik Isroil tomonidan G‘azoda sodir etilgan jinoyatlarga bevosita yoki bilvosita sheriklikdir”, deydi mahalliy hokimiyat.

Ma’lumot uchun, 2023 yil 7 oktyabrdan beri Isroilning G‘azo sektoriga uyushtirgan hujumlari oqibatida kamida 61 020 falastinlik halok bo‘ldi va 150 671 kishi jarohatlandi. 2024 yilning 18 martida o‘t ochishni to‘xtatish kelishuvi buzilganidan beri Isroilning zarbalari oqibatida qo‘shimcha 9519 kishi halok bo‘ldi va 38630 kishi yaralandi.

27 maydan beri AQSH-Isroil G‘azo gumanitar jamg‘armasi homiyligida yordam tarqatish punktlari ochilgan hududlarga uyushtirilgan hujumlarda 1568 nafar falastinlik halok bo‘ldi, 11230 nafari yaralandi.

Isroil, Bosh vazir Binyamin Netanyaxuning so‘zlariga ko‘ra, G‘azo sektorini to‘liq va doimiy bosib olish rejasini amalga oshirmoqda.