Ғазода портлаётган бомбаларнинг ярми Европада ишлаб чиқарилган – Жозеп Боррель

Европа Иттифоқининг ташқи ишлар ва хавфсизлик сиёсати бўйича собиқ комиссари Жозеп Боррель Ғазода портлаётган бомбаларнинг ярми Европада ишлаб чиқарилганини айтди. Бу ҳақда у “Cadena SER” радиосига берган интервьюсида сўз очди.

Боррель Исроил ҳукумати аъзоларига нисбатан санкцияларни жорий этишни қўллаб-қувватлашини билдирган, аммо унинг фикрича, ЕИ бундай қила олмайди.

“Агар Европа хоҳлаганида, Исроилга таъсир кўрсатиш учун жуда кўп имкониятларга эга, лекин Европа бундай қилмайди”, дея кескин фикр билдирган Европа Иттифоқининг ташқи ишлар ва хавфсизлик сиёсати бўйича собиқ раҳбари.

Унинг сўзларига кўра, Европа Исроил билан савдони чеклаши мумкин ва бу Исроилга таъсир кўрсатади. Боррелнинг қўшимча қилишича, Европа Иттифоқи Украинадаги ва Фаластиндаги воқеаларга нисбатан асоссиз ёндашувлари сабабли бутун дунё орасида ишончни йўқотган.

Эслатиб ўтамиз, аввалроқ Буюк Британия, Франция ва Канада Исроилнинг Ғазо секторига ҳарбий ҳужуми ва инсонпарварлик ёрдамини етказишдаги чекловлари сабаб кескин чоралар кўриш билан таҳдид қилган эди.