Ғазо шимолидаги ягона шифохона ҳам фаолиятини тўхтатди

Ғазо шимолида жойлашган сўнгги Камол Адуан шифохонаси ёнилғи йўқлиги сабабли аҳолига хизмат кўрсатишни тўхтатди. Бу ҳақда Фаластин Соғлиқни сақлаш вазирлигига таяниб, “Анадолу” агентлиги хабар берди.

“Камол Адуан шифохонасида электр генератори ёнилғи тақчиллиги туфайли тўхтаб қолди ва вилоят аҳолиси диализ, реанимация, болалар бўлими, ички касалликлар, кардиология, умумий жарроҳлик, тунги парвариш ва болалар шошилинч тиббий ёрдам хизматларидан фойдалана олмайди", дейилади ҳисоботда.

Таъкидлаш жоизки, Исроил армияси 146 кундан бери Фаластин анклавини ўққа тутишда давом этмоқда. Тахминан 2,3 миллион аҳолига эга Ғазо сектори гуманитар фалокатга юз тутмоқда. Исроил тинч аҳоли пунктлари, шифохоналар, мактаблар ва фаластинликлар кўчирилган бошпаналарни нишонга олмоқда ва гуманитар ёрдамларнинг минтақага етиб боришига тўсқинлик қилади.

Халқаро доиралар, хусусан БМТ ташкилотлари Ғазода ўт очишни тўхтатиш ва минтақага инсонпарварлик ёрдами оқимини оширишни талаб қилмоқда.

Эслатиб ўтамиз, аввалроқ Ғазо секторидаги шифохоналарда сўнгги 24 соат ичида камида тўққиз бола очликдан вафот этганди.

Сарвар Хуррамов