Ғарб давлатлари ўз элчихоналарига разведка инфратузилмасини жойлаштирмоқда – КХШТ 

Ғарб давлатлари бузғунчи контентни тарқатиш учун бошқа мамлакатлардаги элчихоналарида разведка инфратузилмасини жойлаштиради. Бу ҳақда Коллектив Хавфсизлик Шартномаси Ташкилоти Бош котиби Имангали Тасмагамбетов хавфсизлик масалалари бўйича олий вакилларнинг ХИИ халқаро йиғилишининг ялпи мажлисида маълум қилди.

"Ғарб давлатларининг кўпинча қабул қилувчи мамлакатларда бузғунчи контентни яратиш ва тарқатиш билан шуғулланувчи дипломатик ваколатхоналарига разведка инфратузилмасини жойлаштиришини ўткир муаммо деб ҳисоблаш мумкин", дейди Бош котиб.

Тасмагамбетов бошқа муаммолар қаторида ахборот хавфсизлиги соҳасидаги муносабатларни тартибга солиш ва бу соҳада бир томонлама сиёсатни амалга ошириш учун халқаро ҳуқуқий базанинг йўқлигини таъкидлади.

Шу билан бирга, КХШТ Бош котиби ўринбосари Валерий Семериков йил давомида терроризмни молиялаштириш бўйича 2,4 мингдан ортиқ факт аниқланганини маълум қилди.

“27 жиноий иш қўзғатилди, гиёҳвандлик воситаларидан олинган даромадларни легаллаштириш бўйича 640 нафар шахс иштирокида 90 мингдан ортиқ шубҳали молиявий операциялар аниқланди", дейди Семериков.

Унинг қўшимча қилишича, бутун дунёдаги ва КХШТ масъулияти ҳудудидаги ҳарбий-сиёсий вазият катта ташвиш уйғотмоқда.

"Фаолиятнинг барча соҳаларида жуда катта можаро салоҳияти тўпланган ва бунинг фонида баъзи давлатлар ўз мақсадларига эришиш учун турли хил халқаро террорчилик ташкилотларидан фойдаланади", дейди КХШТ Бош котиби ўринбосари.

Эслатиб ўтамиз, аввалроқ КХШТ Бош котиби Имангали Тасмагамбетов Марказий Осиё минтақасида ҳудуд ва сув каби ресурслар сабаб можаролар эҳтимоли ортиб бораётганини таъкидлаганди.