Futbol bayrami! Ertaga O‘zbekistonda davlat ishlari kechroq boshlanadi

O‘zbekiston Prezident Shavkat Mirziyoyev ertaga, 18 iyun kuni O‘zbekiston terma jamoasining Jahon chempionatidagi ilk uchrashuvi munosabati bilan barcha davlat tashkilotlarida ish vaqtini soat 10:00 da boshlanishini belgilab berdi. Bu haqda Prezident matbuot kotibi Sherzod Asadov ma’lum qildi.

“Prezidentimiz ertangi matchni uyda, oila davrasida, nabiralari bilan tomosha qiladilar. 18 iyun kuni barcha davlat tashkilotlarida ish vaqtini soat 10 da boshlanishini belgilab berdilar”, deydi Sherzod Asadov.

Ma’umot uchun, O‘zbekiston Jahon chempionatidagi tarixiy uchrashuvda Kolumbiyaga qarshi maydonga tushadi. Ushbu uchrashuv Toshkent vaqti bilan soat 07:00 da Meksikadagi “Asteka” stadionida bo‘lib o‘tadi. Keyingi bahslarda esa Fabio Kannavaro shogirdlari Portugaliya (23 iyun) va Kongo Demokratik Respublikasiga (28 iyun) qarshi maydonga tushadi.

Eslatib o‘tamiz, avvalroq O‘zbekiston milliy terma jamoasi futbolchisi Jaloliddin Masharipov jarohati sababli Jahon chempionatida ishtirok etolmasligi haqida xabar berilgandi.