Франциялик таниқли футболчи фаолиятини якунлади

Франция терма жамоаси ва "Бавария"нинг собиқ ярим ҳимоячиси Франк Рибери профессионал футболдаги фаолиятини якунлади. Бу ҳақда футболчининг ўзи ижтимоий тармоқдаги саҳифасида маълум қилди.

“Ажойиб саргузашт учун барчангизга раҳмат”, деб ёзди Рибери.

Футболчининг сўнгги жамоаси Италиянинг "Салернитана" клуби бўлди. Томонлар ўзаро келишувига кўра шартномани бекор қилишди.

Рибери фаолиятидаги энг ёрқин даврни Мюнхеннинг "Бавария" жамоасида ўтказди. У "Бавария" билан тўққиз марта Германия чемпионати ғолиблигини қўлга киритди, олти марта Германия кубоги, Германия лига кубоги, беш марта мамлакат Суперкубогига эга чиқди. Шунингдек, Франк Европа Чемпионлар лигаси, UEFA суперкубоги ва Клублар ўртасидаги Жаҳон чемпионатининг олтин медалларига сазовор бўлди.

Маълумот учун, Рибери кўпгина индивидуал совринлар соҳиби ҳам ҳисобланади. 2013 йилда у Европанинг "Энг яхши футболчиси" деб топилган.

Шахзод Шукуров