Франциялик 21 ёшли мотопойгачи мусобақа вақтида вафот этди

Кеча, 12 январь куни йўлтанламас (off-road) пойга мусобақаси вақтида 21 ёшли истиқболли спортчи Рафаэля Шоле авария оқибатида вафот этди. Бу ҳақда “Motorcycle Sports” нашри хабар берди.

Маълум қилинишича, воқеа Франциянинг Грайан коммунасида ўтказилган мусобақа давомида юз берган.  Рафаэль трассанинг бир қисмида жойлашган сунъий тўсиқдан сакраб ўтишга уринган, бироқ ҳавода мотоцикл бошқарувини йўқотиб, ерга йиқилган. Шу заҳоти унинг ортидан катта тезликда келаётган бошқа мотопойгачи спортчини уриб юборган.

Оқибатда Рафаэль Шолле оғир тан жароҳатлари олган. Тиббий жамоа томонидан зудлик билан кўрсатилган барча саъй-ҳаракатларга қарамай, франциялик спортчи олган жароҳатлари оқибатида шифохонада вафот этган.

Эслатиб ўтамиз, аввалроқ аралаш жанг санъати (ММА) бўйича жаҳон чемпиони, 15 ёшли тожикистонлик спортчи Муҳаммадали Садуллаев Тожикистонда бир гуруҳ ўсмирлар ўртасида юзага келган можаро оқибатида вафот этган эди.