Францияда мухлислар “Ницца” ўйинчиларини калтаклади

Франциянинг “Ницца” футбол клуби мухлислари миллий чемпионат ва Европа лигасидаги ёмон натижалар туфайли жамоа футболчиларини калтаклади. Бу ҳақда “L’equipe” нашри хабар берди.

Манбага кўра, кетма-кет олтинчи мағлубиятни қабул қилиб олган “Ницца” футболчиларини машғулот маркази олдида 400 га яқин мухлис кутиб олган. Айнан шу ерда икки томон ўртасида кескин тўқнашув келиб чиққан.

Хабарларга кўра, икки футболчи Жереми Бога ва Терем Моффи айрим мухлисларнинг жисмоний ҳужумига учраган ва ўзини ҳимоя қилишга мажбур бўлган.

Кўплаб фанатлар мағлубият сериясидан сўнг ўз норозиликларини билдириш, жамоани “уйғотиш” мақсадида тўпланган, бироқ бу учрашув спорт директори Флориан Морис, шунингдек, Бога ва Моффи билан кескин тортишувларга сабаб бўлган.

Ўйинчилар автобусдан тушиб, машиналарига йўл олганида, улар оломон орасидан ўтишга мажбур бўлишган. Оқибатда Терем Моффи ва Жереми Богани айрим фанатлар урган ва ҳатто юзларига тупурган. ОАВ хабарларига кўра, ҳар икки футболчи ҳуқуқни муҳофаза қилувчи органларга шикоят қилишга қарор қилган.

Улар тиббий ёрдам ҳам олган. Моффи камида 1 ҳафтага сафдан чиққани, Бога эса беш кунлик меҳнатга лаёқатсизлик варақаси олгани айтилмоқда. Айни пайтда Франция футболчилар касаба уюшмаси воқеаларни кескин қоралаб, футболчиларнинг хавфсизлиги таъминланиши шартлигини таъкидламоқда.

Маълумот учун, “Ницца” ҳозирда Liga 1’да 17 очко билан 10-ўринда бормоқда.