Франция оролида вирус ортидан фавқулодда ҳолат жорий этилди

Франция ҳукумати Ҳинд океанидаги денгиз орти ҳудудида жойлашган Реюньон оролида чикунгунья вируси билан касалланишнинг ўсиши қайд этилгани сабаб фавқулодда режимни фаоллаштирди. Бу ҳақда “France bleu” хабар берди.

Маълум қилинишича, эпидемия бошланганидан бери 20 мингдан ортиқ касалланиш ҳолати қайд этилган. Тиббий хизматлар жавоб чораларини кучайтирган.

Қайд этилишича, орол пойтахт Париждан тахминан 9 минг км жануби-шарқда, Мадагаскар оролидан эса шарқда жойлашган. Қўшни Маётта оролида маҳаллий соғлиқни сақлаш хизматлари тиббий тизимнинг ортиқча юкланишига йўл қўймаслик учун жавоб чораларини кучайтирган.

Маълумот учун, чикунгунья Аэдес турига мансуб чивинлар чақиши орқали юқадиган вирусли касалликдир. У ҳароратнинг кескин кўтарилиши, бўғимларда кучли оғриқлар, ҳолсизлик, бош оғриғи ва тошмаларни келтириб чиқаради.

Касалланганларнинг аксариятида инфекция енгил шаклда кечади ва касалхонага ётқизишни талаб қилмайди. Шунга қарамай, кекса ва заиф беморлар учун асоратлар юзага келиши мумкин. Махсус даволаш йўқ, симптоматик терапия қўлланилади.

Ҳозирги эпидемиологик вазият

2024 йил август ойидан бери Реюньонда чикунгунья вируси билан касалланишнинг 20 мингдан ортиқ ҳолати қайд этилган.

Фақатгина 2025 йил март ойининг биринчи ҳафтасида 6 мингга яқин янги ҳолатлар аниқланган.

Жаҳон соғлиқни сақлаш ташкилоти фаол сайёҳлик ва миграция оқимлари фонида вируснинг трансчегаравий тарқалиши хавфи ҳақида огоҳлантирмоқда.

Маълумот ўрнида, Реюньон ороли – Ҳинд океанида жойлашган Франциянинг ташқи ҳудуди ҳисобланади. Орол вулканик келиб чиқишга эга ва унинг энг баланд нуқтаси Питон дес Неигес. Оролнинг иқлими тропик бўлиб, тоғлар туфайли ҳарорат ўзгариб туради. Аҳолиси тахминан 880,000 киши, асосан француз, ҳинд, африкалик ва маҳаллий этник гуруҳлардан иборат. Орол француз тилида сўзлашилади. Тарихан, 1642 йилда французлар томонидан колонизация қилинган ва 1793 йилда инқилобчилар томонидан Реюньон деб номланган. Оролнинг иқтисодиёти асосан қишлоқ хўжалиги, балиқчилик ва туризмга асосланган. Орол Франция Республикасининг расмий ҳудуди сифатида бошқарилади.

Эслатиб ўтамиз, аввалроқ Францияда уруш ёки эпидемия даврида омон қолиш учун аҳолига қўлланма тайёрланаётгани ҳақида хабар берилганди.