Фатининг укаси Ямалнинг уйида жиноят содир этишда гумонланмоқда – ОАВ

“Барселона”нинг 18 ёшли футболчиси Ламин Ямалнинг уйида содир этилган жиноят бўйича клуб аъзоси Ансу Фатининг укаси гумон қилинмоқда. Бу ҳақда ABC News хабар берди.

Манбага кўра, Нидерландия фуқароси бўлган бир аёл Ламин Ямалнинг уйида жинсий зўравонликка учраганини даъво қилган.

Хабарда айтилишича, воқеа жорий йилнинг 8 февраль куни содир бўлган. Қиз Фатининг укаси – Фатиньо иштирок этган тунги клубдаги зиёфатга борган. Шундан сўнг  давра иштирокчилари Барселонадаги хонадонлардан бирига йўл олган.

Аёлнинг кўрсатмасига кўра, у эрталаб яланғоч ҳолда уйғонган ва “ноўрин тегиниш” туфайли уйғониб кетганини билдирган. У ўзини гиёҳванд моддалар таъсирида бўлган пайтда жинсий зўравонлик қурбони бўлган бўлиши мумкин деб ҳисобламоқда ҳамда шифохонада тиббий текширувлардан ўтган.

Дастлабки оғзаки мурожаатида аёл ноўрин тегинишдан сўнг Фатиньонинг юзига шапалоқ туширганини айтган. Ҳозирча тергов унинг кўрсатмалари асосида олиб борилмоқда.

Шунингдек, аёл ҳодиса Ламин Ямалнинг уйида содир бўлганини иддао қилган. Бироқ, “Барселона” клуби бу маълумотни рад этди. 

Полиция манбалари ҳам воқеа бошқа манзилда юз берган бўлиши мумкинлигини билдирган. Фатиньонинг вакиллари эса аёлнинг баёнотларини ёлғон деб атаб, билдирилган айбловларни қатъиян рад этган.