Фарғонада жиноий гуруҳ аниқланди

Фарғона вилоятининг Фарғона шаҳрида бировнинг квартирасини сотиб олиб, унга пул бермай, қўрқиқтиш йўли билан эгалламоқчи бўлган жиноий гуруҳ қўлга олинди. Бу ҳақда вилоят Ички ишлар бошқармаси хабар берди. 

Қайд этилишича, 1978 йилда туғилган фуқаро 2024 йилнинг март ойида жабрланувчининг икки хонали квартирасини 35 000 долларга сотиб олган. Пулни эса бир ой муддатда тўлашни ваъда қилган. Бироқ белгиланган муддатда пулларни тўлаш фикридан қайтиб, ҳамтовоқлари билан ишни ҳал қилмоқчи бўлган. 

У ўзининг 3 шериги билан жиноий режа тузган. Режага кўра, жабрланувчини қўрқитиш ва зўрлик ишлатиш ҳамда қарздан воз кечиш ҳолигача олиб келиш керак бўлган. Бунинг учун эса уларнинг ҳар бири 5000 доллардан пул олиши керак эди. Оддий қилиб айтганда, 15 минг доллар сарфлаб, қарзидан қутулиб, вазиятдан фойда билан чиқиш режа қилинган. 

Мазкур ҳолат юзасидан Жиноят кодексининг 166-моддаси (талончилик) билан жиноят иши қўзғатилган. Олинган тезкор маълумотларга асосан ҳамкорликда ўтказилган тадбирлар давомида гумонланувчиларнинг барчаси Фарғона шаҳри ҳудудида аниқланиб, ушланган. Ҳозирда ҳолат юзасидан дастлабки тергов ҳаракатлари олиб борилмоқда.

Эслатиб ўтамиз, аввалроқ зарарли вируслар орқали фуқароларнинг банк карталари маълумотини олиб, 1 млрд сўмга яқин пул ўғирлаган жиноий гуруҳ аъзолари қўлга тушганди.