Фарғонада яна катта ёнғин содир бўлди (видео)

Фарғона вилояти Учкўприк туманида қурилиши тугалланмаган цех ёниб кетди. Бу ҳақда вилоят Фавқулодда вазиятлар бошқармаси матбуот хизмати хабар берди. 

Маълум қилинишича, бугун, 19 июнь куни соат 12:42 да Учкўприк туманидаги “Авилон Қўқон текстиль” МЧЖга қарашли калава ва рангли ип ишлаб чиқарувчи цех биносида ёнғин келиб чиққан. Бинонинг 150 квадрат/метр том қисми, оператор ва қоровул хонаси ёниб зарарланган. 

Ёнғин-қутқарув экипажи ҳодиса жойига 12:45 да етиб борган ҳамда ёнғин 12:48 да ўраб олиниб, 13:02 да ўчирилган. Ёнғиндан цех биносининг 2000 квадрат/метр майдони сақлаб қолинган. 

Ҳозирда ёнғин сабаби ва зарар миқдори аниқланаётгани хабар қилинган. Ҳодиса оқибатида жабрланганлар ва ҳалок бўлганлар йўқлиги айтилмоқда. 

Эслатиб ўтамиз, аввалроқ Қўқон шаҳридаги бозор ёниб кетганди. Ёнғин 4 соат ичида ўчирилганди. Кейинроқ ҳолат юзасидан жиноят иши қўзғатилди. Шунингдек, бозорда ёниб кетган дўконлар тез орада қайта қуриб берилиши маълум қилинди.