Фарғонада авиайўловчи 483 млн сўмлик тақинчоқларни яшириб олиб ўтишга уринди

Туркиядан Фарғона вилоятининг Фарғона шаҳрига учиб келган йўловчининг 483 миллион сўмлик заргарлик буюмларини яшириб олиб киришига чек қўйилди. Бу ҳақда вилоят Божхона бошқармаси хабар берди.

Қайд этилишича, “Истанбул-Фарғона” йўналишида Фарғона шаҳрига учиб келган фуқаро “Фарғона аэропорти” чегара божхона постида олиб кириш меъёридан ортиқча ва божхона назоратидан ўтказилиши зарур бўлган товарлари мавжуд эмаслигини маълум қилган ҳолда йўловчи божхона декларациясини тўлдирмасдан “яшил йўлак” орқали ҳаракатланган. Унинг ҳаракатлари божхона ходимларида шубҳа уйғотгани сабабли тўхтатилиб, ўзи ва унга тегишли бўлган қўл сумкалари белгиланган тартибда божхона назоратидан ўтказилган.

Оқибатда фуқаро қўл сумкасида, ўзида тақилган ва тана аъзоларига яширилган умумий қиймати 483 миллион сўмлик оғирлиги 620 граммга тенг бўлган 5 турдаги 105 дона заргарлик буюмларини божхона назоратидан яшириб олиб ўтаётгани аниқланган. Ҳозирда ҳолат юзасидан терговга қадар текширув ҳаракатлари олиб борилмоқда.

Эслатиб ўтамиз, аввалроқ Туркия бозорларида ҳақиқий олтиндан ажратиш қийин бўлган қалбаки олтин билан савдо қилувчи фирибгарлар пайдо бўлгани хабар қилинганди.