Эронда Британия разведкаси билан алоқада гумон қилинган 7 киши ҳибсга олинди

Ислом инқилоби қўриқчилари корпуси (ИИҚК) Эронда “Британия махсус хизматлари қўмондонлиги остида тартибсизликлар вақтида мамлакатда қўпорувчилик ҳаракатларига раҳбарлик қилган” гуруҳ етакчилари аниқлангани ва ҳибсга олингани ҳақида эълон қилди. Бу ҳақда ИИҚК баёнотига таяниб, “Тасним” агентлиги хабар берди. 

“Буюк Британия агентлари бошчилигидаги ва мамлакат ичкарисида ва ташқарисида фаол аксилинқилобий элементлардан иборат гуруҳ тузган, айниқса сўнгги тартибсизликлар пайтида Эронда қўпорувчилик фаолиятига раҳбарлик қилган “Загрос” номли уюшган гуруҳ муваффақиятли операция амалга оширилган ҳолда топилди”, дейилади хабарда. 

Баёнотда айтилишича, гуруҳнинг хорижий агентлар билан барча алоқалари аниқланган ва блокланган. 

Аввалроқ Эрон Ташқи ишлар вазирлиги Европа Иттифоқи ва Буюк Британиядан тўққизта ташкилот ва 23 нафар шахсга қарши жавоб санкциялари қўлланилишини маълум қилганди.