Эрон биринчи ҳаво таксисини ишга туширди

Эрон кеча, 24 май куни мамлакатдаги биринчи ҳаво таксисини расман ишга туширди ва бу миллий авиация ривожланишида янги саҳифа очди. Бу ҳақда ИРНА хабар берди.

Президент Масъуд Пезешкиённинг видеомурожаати иштирокида Хуррамшаҳр озод қилинганининг бир йиллиги ҳамда Йўл ва шаҳарсозлик вазирлиги лойиҳалари очилишига бағишланган тантанали маросим бўлиб ўтди.

Биринчи ҳаводаги такси рейси Караж ва Қазвин шаҳарларини боғлаб, мунтазам транспортнинг бошланишини белгилади.

Вазир маслаҳатчиси, Алоқа ва ахборот технологиялари вазирлигига қарашли “Паям” махсус иқтисодий зонаси ва халқаро аэропорти бош директори Моҳсен Ҳасанлу мазкур тадбир мамлакат авиация саноати учун муҳимлигини таъкидлади.

“Авиатаксининг ишга туширилиши катта истиқболга эга бўлган муҳим ютуқдир”, деди у.

Ҳасанлунинг сўзларига кўра, янги транспорт тури “Паям” махсус иқтисодий зонасига янги сармояларни жалб қилиш, миллий иқтисодиётни рағбатлантириш ва Алборз вилоятини ривожлантиришга ёрдам беради. Бундан ташқари, аҳолининг авиация хизматларидан кенг фойдаланиши учун қулай шароит яратади.

“Ҳаво таксиларининг жорий этилиши тўлиқ фойдаланилмаётган ҳаво йўлларини қайта тиклашда муҳим роль ўйнайди”, деди Ҳасанлу.

Унинг таъкидлашича, бу халққа ҳаво қатновидан фойдаланиш имконини берадиган ва инвесторларга янги инвестиция имкониятларини тақдим этадиган инновацион хизмат.

Эроннинг биринчи ҳаво таксисининг ишга туширилиши мамлакат транспорт инфратузилмасини янгилаш ва авиация хизматларидан фойдаланиш имкониятларини кенгайтиришдаги муҳим қадам сифатида баҳоланмоқда.