Эрдўған Путин ва Зеленский билан анчадан буён нимани муҳокама қилаётганини очиқлади

Бугун, 14 декабрь куни Туркия Президенти Ражаб Тойиб Эрдўған ва Озарбайжон Президенти Илҳом Алиев Туркманистон газини каспий денгиз орқали Туркияга етказиш ва Европа бозорига олиб чиқиш бўйича ишларни мувофиқлаштириш бўйича Туркманбошига йиғилдилар. Икки давлат раҳбари ҳам Туркманистонга рафиқалари Эмина Эрдўған ва Меҳрибон Алиева билан ташриф буюрган. 

Уч томонлама саммитда сўз олган Туркия раҳбари Туркманистоннинг тез орада Туркий давлатлар ташкилотидан кузатувчи мақомидан доимий аъзога айланишига умид билдирди. 

“Ишончим комилки, Анқара, Баку ва Ашхободнинг қардошлик алоқалари мамлакатларимизнинг стратегик имкониятларидан келиб чиқиб мустаҳкамланади. Мақсадимиз глобал ва минтақавий жараёнлардан аҳоли манфаати учун минтақавий барқарорликни ҳисобга олган ҳолда тўлиқ фойдаланишдир”, дейди Эрдўған.

Туркия раҳбарининг сўзларига кўра, давлатларнинг ўзаро ҳамкорлиги ҳозирги замон синовлари ва инқирозлари фонида айниқса муҳимдир. 

Унинг таъкидлашича, Россия-Украина уруши дунёда озиқ-овқат ва энергетика хавфсизлигини ларзага солган, Украинада содир бўлаётган воқеаларнинг оқибатлари барча мамлакатларда у ёки бу тарзда, жумладан, инфляциянинг ўсиши орқали сезилади. 

"Украина атрофидаги инқироз бошиданоқ мен урушда ғолиб бўлмаслиги ва дунё ҳамма ютқазишини айтдим. Адолатли дунёга фақат мулоқот орқали эришиш мумкин. Шу боис биринчи кунданоқ қон тўкилишини тўхтатишга интилдик, давлат раҳбарлари даражасида ҳам, бошқа жойларда ҳам самимий қадамлар ташладик”, дейди Президент. 

Давлат раҳбари Россия Федерацияси ва Украина делегацияларининг Истанбулда юзма-юз учрашганини эслатиб, ушбу музокаралар столи ҳамон тан олинган платформа бўлиб қолаётганини таъкидлади. 

Туркия раҳбари эътиборни Анқаранинг Украина бўйича воситачилик саъй-ҳаракатларига қаратди, бу эса асирлар алмашинувига эришиш имконини берган ва “дон келишуви”га йўл очган. 

“Президент Владимир Путин ва Владимир Зеленский билан мулоқотим шу йўналишда давом этмоқда. Умид қиламанки, биз ўт очишни тўхтатиш бўйича келишувга эриша оламиз, бу эса узоқ муддатли тинчликка йўл очади”, дейди Туркия Президенти.