Эрдўған БМТ минбарида “Қримнинг аннексияси” ҳақида гапирди
Олам
−
22 Сентябрь 2021 12638 2 дақиқа
Туркия Қримнинг Россия таркибига киришини тан олмайди. У Украинанинг ҳудудий яхлитлигини сақлаш тарафдори. Бу ҳақда Республика Президенти Ражаб Тойиб Эрдўған Бирлашган Миллатлар Ташкилоти Бош Ассамблеясининг 76-сессияси умумсиёсий мунозарасида маълум қилган.
“Биз Украинанинг ҳудудий яхлитлиги ва суверенитетини, шу жумладан, Қрим ҳудудини ҳимоя қилишга катта аҳамият берамиз”, деган Эрдўған.
Таъкидланишича, Туркия Ташқи ишлар вазирлиги аввалроқ, Қримда Давлат думасига сайловни тан олишдан бош тортган. Уларнинг натижалари Анқара учун қонуний кучга эга эмас, чунки у яриморолнинг Россияга қўшиб олинишини ноқонуний деб ҳисоблайди.
Кремль эса Туркиянинг сайловни тан олмаслик қарорини номақбул деб атаган ва Россия Ташқи ишлар вазирлиги тегишли хулосалар чиқаришга ваъда берган.
“Туркия Қрим Россия Федерациясининг суверен қисми эканлигини ва биз ҳеч қачон бундай баёнотларни эътиборсиз қолдирмаслигимизни жуда яхши билади”, деган вазирлик расмий вакили Мария Захарова.
Маълумот ўрнида, Қрим 2014 йилда ўтказилган референдум натижасида Россия таркибига кирган. Бу қарорни овоз беришда иштирок этган яриморол аҳолисининг 96 фоизи қўллаб-қувватлаган. Украина ва Ғарб давлатларининг аксарияти референдум натижаларини тан олмаган ва Қримнинг аннексиясини эълон қилган.
