Машмашали “Олтин тўп”

Охирги йилларда ҳеч интрига тақдим этмай келаётган “Олтин тўп” маросими бу сафар дунё футболини етарлича ҳаяжонда ушлаб тура олди. Анча вақт олдин эгаси “Реал” аъзоси Винисиус Жуниор дея тахмин қилинган соврин кутилмаганда Ман Сити футболчиси Родрига тақдим этилди. Бу эса табиийки “Реал” ва “Винисиус тарафдорларининг қайсидир маънода ўринли эътирозларига сабаб бўлди. “Олтин тўп”дек нуфузли соврин ўз мавқейини йўқотди, деган фикрлар янгради. Жаҳон футболида ана шундай баҳсли вазият юзага келган бир паллада ўзимизнинг қоракўзлар бири Францияда, бири Осиёда энг яхши футболчи бўлишни уддалади.

Ассалому алайкум. Тушуниб улгурганингиздек, бугун спорт дайжестида баҳсли “Олтин тўп”, Европа грандлари нишонида турган ўзбекистонлик футболчилар Аббосббек Файзуллаев ва Абдуқодир Ҳусанов, шунингдек, Ўзбекистонда пойтахт гегемониясини тугатган Қаршининг “Насаф” клуби ҳақида сўз очамиз. Биз бошладик.

Родри “Олтин тўп” соҳиби бўлди 

29 октябрьга ўтар кечаси Франция пойтахти Париж шаҳридаги “Шатл” театрида ўтган мавсум бўйича футбол оламидаги энг яхшиларни аниқлаш маросими бўлиб ўтди ва энг яхши футболчи учун тақдим этиладиган “Олтин тўп” совринини “Манчестер Сити” клубининг испаниялик футболчиси Родри қўлга киритди.

Маросимдан олдин совринни қўлга киритиши кутилган Реалнинг бразилиялик футболчиси Винисиус Жуниор эса 2-ўринни қўлга киритади.

“Олтин тўп” натижаларидан норози бўлган Мадриднинг “Реал” клуби эса Европа футбол ассоциациялари иттифоқига (UEFA) апелляция киритмоқчи.

Шундай қилиб, Родри 1960 йилдан бери “Олтин тўп”ни қўлга киритган биринчи испаниялик футболчи бўлди. Ўша йили афсонавий Луис Суарес совринга эга чиққан эди.

Аёллар ўртасидаги энг яхши футболчи деб “Барселона” аъзоси Айтана Бонмати эътироф этилди.

“Реал” нега Винисиусга “Олтин тўп” берилмаганининг сабабини аниқлади

Ўтган мавсум якунлари бўйича “Олтин тўп" соҳиби “Манчестер Сити” ярим ҳимоячиси Родри бўлди. Маросим олдидан аксарият таҳлилчилар ва букмекерлар “Реал” вингери Винисиус Жуниор совринни олишига ишонган, бироқ сўнгги лаҳзада испаниялик футболчи совринни қўлга киритиши маълум бўлди. Мадрид клуби бу ҳолатдан ғазабда ва содир бўлган воқеа учун ким жавобгар эканлигини аниқлади.

Президент Флорентино Перес ва бошқа “Реал Мадрид” раҳбарлари бу вазиятга UEFA президенти Александр Чефериннинг таъсири катта бўлганига ишонмоқда. Сабаби, Перес ва Мадрид клуби футбол Суперлигаси ташкил этилишини қўллаб-қувватламоқда, UEFA президенти эса бундай турнирга кескин қарши.

“Реал Мадрид” менга Виниcиус ғалаба қозонган ёки йўқлигини билиш учун босим ўтказаётган эди ва эҳтимол менинг сукут сақлашим уларни Вини ютқазган деб ўйлашига сабаб бўлди, шунинг учун улар маросимга келмади. Мен бундан ҳайратдаман, лекин бу ҳақда гаплашиб тунни ўтказишни хоҳламайман. Мен ғолибимиз Родри ҳақида гапирмоқчиман”, дейди “France football” муҳаррири.

Қайд этиш жоиз, гарчи “Реал” аъзолари “Олтин тўп” топшириш маросимининг бир нечта номинацияларида ғолиб бўлган бўлса ҳам, “қироллик клуби”дан Париж шаҳридаги “Шатл” театри мезбонлик қилган маросимга ҳеч ким бормади.

Футбол оламидаги энг яхшилар аниқланди

29 октябрга ўтар кечаси Франция пойтахти Париж шаҳрида ўтказилган “Олтин тўп” топшириш маросимида йилнинг энг яхши футболчисидан ташқари, бошқа бир нечта номинацияларда ҳам ғолиблар аниқланди.

Жумладан, Мадриднинг “Реал” клуби устози Карло Анчелотти ўтган мавсумнинг энг яхши мураббийи бўлди. Аёллар футболидаги энг яхши мураббий деб “Челси” устози Эмма Ҳаес эътироф этилди.

Аргентина терма жамоаси ва Англиянинг “Астон Вилла” клуби посбони Эмилиано Мартинес йилнинг энг яхши дарвозабони бўлди.

Энг яхши эркаклар жамоаси совринини “Реал Мадрид”, аёллар жамоаси мукофотини эса “Барселона” қўлга киритди.

Йилнинг энг яхши ёш футболчиси “Барселона” аъзоси Ламин Ямал бўлди.

Энг яхши ҳужумчи сифатида “Бавария” аъзоси Харри Кейн ва “Реал” вингери Килиан Мбаппе қайд этилди.

Аббосбек Файзуллаев Осиёнинг энг яхши ёш футболчиси бўлди

29 октябрь куни Жанубий Корея пойтахти Сеул шаҳрида Осиё қитъаси бўйича футбол олами вакилларининг энг яхшиларини тақдирлаш маросими бўлиб ўтди.

Ўзбекистон миллий терма жамоаси ва Россиянинг ЦСКА клуби аъзоси Аббосбек Файзуллаев қитъада йилнинг энг яхши ёш футболчиси, деб эътироф этилиб, махсус соврин билан тақдирланди. Файзуллаевдан ташқари яна икки футболчи япониялик Гаку Навата ва жанубий кореялик Баэ Жун-ҳо совринга даъвогарлик қилди.

Маълумот учун, Аббосбек Файзуллаев Ўзбекистоннинг энг қиммат футболчиси ҳисобланади. 21 ёшли футболчи шу вақтга қадар Ўзбекистон миллий терма жамоасида 21 та ўйинда майдонга тушиб, 4 та гол урган ва 1 та голли узатмани амалга оширди. “Transfermarkt”га кўра, футболчининг қиймати 6 миллион еврони ташкил этади.

Абдуқодир Ҳусанов “Ланс”да ойнинг энг яхши футболчиси бўлди

Ўзбекистон миллий терма жамоаси ва Франциянинг “Ланс” клуби аъзоси Абдуқодир Ҳусанов клубининг октябрь ойидаги энг яхши футболчиси деб топилди. Бу ҳақда клуб матбуот хизмати хабар берди.

Октябрь ойида 20 ёшли Ҳусанов жамоасининг барча ўйинларида иштирок этиб, тўлиқ 90 дақиқа ҳаракатланди. Жорий мавсумда эса ҳимоячи “Ланс” сафида жами 11 та ўйинда майдонга тушди.

Ойнинг энг яхши футболчисини аниқлаш бўйича овоз бериш жараёнларида ўзбекистонлик футболчи жамоадошлари Факундо Медина ва Анди Диуф каби футболчиларни катта фарқ билан ортда қолдирди. Ҳусанов 82,84 фоиз овоз билан етакчи бўлди.

“Насаф” муддатидан аввал Ўзбекистон чемпиони бўлди

1 ноябрь куни футбол бўйича Ўзбекистон чемпионати ўйинлари давом эттирилди. Тур доирасида Тошкентнинг “Локомотив” клуби Қаршининг “Насаф” жамоасини қабул қилиб, кичик ҳисобда имкониятни бой берди.

Учрашувнинг 1-бўлимида қатор вазиятлар юзага келтирилган бўлса ҳам, ҳисоб очилмади. 1-тайм фақатгина “темирйўлчилар” аъзоси Иван Рогачнинг ҳакам томонидан ўйиндан четлатилиши билан эсда қолди.

2-бўлимнинг 73-дақиқасида қаршиликларнинг ҳужумини Акмал Мозговой гол билан якунлади. Футболчи жамоадошининг узатмасини қайчи услубида “Локомотив” дарвозасига йўллаб, ўйиндаги ягона голни киритди.

Шундай қилиб, “Насаф” ўз тарихида илк бор Ўзбекистон чемпионлигини қўлга киритиб, Тошкент клубларининг чемпионатдаги 22 йиллик гегемониясига барҳам берди.