Диққат! Адлия вазирлиги сохта ёнғин хавфсизлиги ходимларидан огоҳлантирди

Охирги йилларда куз ва қиш ойларида маҳаллаларда махсус-форма кийиб юрган шахслар ўзларини “давлат ёнғин назорати органи ходими” сифатида таништириб, фуқаролардан йиллик 20 000-40 000 сўм атрофида мажбурий тарзда солиқ ёки коммунал тўлов сифатида ноқонуний пул йиғиши ҳолатларига гувоҳ бўлганмиз.

Адлия вазирлиги яқинлашаётган куз-қиш мавсумида шундай шахслардан эҳтиёт бўлишга чақирди.

“Юқоридаги масалалар бўйича келиб тушган мурожаатлар ўрганилганда, ушбу ҳаракатлар турли хил шаклда ташкил этилган, асосан номида “ёнғин”, “олов”, “қарши кураш”, “хавфсизлик”, “ҳимоя” каби сўзлардан иборат бўлган ва ёнғиннинг олдини олиш акс этган турли хил рамзлар туширилган муҳр-штамплардан фойдаланиб келаётган тадбиркорлик субъектлари томонидан амалга ошириб келинаётганлиги маълум бўлди”, дейилади.

Адлия вазирлигининг маълум қилишича, айрим шахслар томонидан ўзларини “давлат ёнғин назорати органлари ходими” сифатида таништирган ҳолда ёлғон маълумотлар асосида фуқаролардан мажбурий тўлов тўланишини талаб этиши ноқонуний.

Маълум бўлишича, фуқаролар мажбурий тарзда қуйидаги коммунал хизматлар учун тўловларни белгиланган тартибда тўлаб бориши лозим:

•  Совуқ сув таъминоти;

•  Иссиқ сув таъминоти (кўп қаватли уйларда);

•  Электр таъминоти;

•  Газ таъминоти;

•  Иссиқлик таъминоти (кўп қаватли уйларда);

•  Канализация (истеъмолчи уланган бўлса);

“Шу ўринда такроран маълум қилинадики, ёнғин ва унинг олдини олиш билан боғлиқ бирон бир тўлаб борилиши шарт бўлган коммунал тўлов ёки солиқ қонунчиликда мавжуд эмас. Маъмурий жавобгарлик тўғрисидаги кодекснинг 209¹-моддасига кўра формали кийим-бош кийиб юриши назарда тутилган вазирликлар, идоралар ва ташкилотлар ҳарбий хизматчилари ҳамда ходимларининг тасдиқланган намунадаги ҳарбий, идоравий ва махсус формали кийим-бошини бундай ҳуқуққа эга бўлмаган шахслар томонидан кийиб юриш учун жавобгарлик белгиланган”, дейилади Aдлия вазирлигининг хабарида.

Aҳрорбек Ҳайруллаев