Дани Алвес Португалияда футбол клубини сотиб олмоқчи

“Барселона” ва Бразилия терма жамоасининг собиқ футболчиси Дани Алвес Португалиянинг Лига 3 (учинчи дивизион) клуби “Сао Жао Вер” футбол клубини сотиб олишга қизиқмоқда. Бу ҳақда “A Bola”  нашри хабар беради.

Манбага кўра, дастлабки таклиф футболчининг жамоада ўйнаши ва шу билан бирга маъмурий ҳамда спорт бошқаруви вазифаларини бажаришини назарда тутади. Алвес дебютини ўтказиб, кейинги мавсумдаёқ қайтишни режалаштирмоқда.

Футболчи Испанияда жинсий зўравонлик айблови билан ҳибсга олинганидан сўнг 2023 йилдан бери майдонга тушмаган. Иш бир йилдан ортиқ давом этган. Шу вақт давомида у ҳибсда қолган ва 2024 йилда тўрт ярим йилга озодликдан маҳрум қилинган. 2025 йилда эса суд далиллар етарли эмаслиги сабабли ҳукм бекор қилинган эди.

Маълумот учун, Дани Алвес олти карра Испания чемпиони, “Барселона” билан уч карра Чемпионлар лигаси ғолиби ва “Севиля” билан икки карра UEFA кубоги соҳиби ҳисобланади. Ҳимоячи шунингдек, ПСЖ билан икки марта Франция чемпионлигини қўлга киритган.

Эслатиб ўтамиз, аввалроқ Дани Алвес жинсий зўравонлик айблови бўйича оқлангач, Жиронадаги Элим евангелист черковида воизлик қилаётган эди.