Бухоролик йигит исиниб олиш учун автомобиль ўғирлади

Бухоро шаҳрида 28 яшар маст ҳолатдаги эркак исиниб олиш учун бировнинг автомобилини ўғирлаб, сўнг уни кўчага ташлаб кетди. Бу ҳақда ЙҲХББ Матбуот хизмати хабар берди. 

Қайд этилишича, куни кеча шаҳарнинг Aҳмад Яссавий кўчасида 1998 йилда туғилган фуқаро бошқарувидаги оқ рангли Cobalt русумли автомобиль ўғирлаб кетилган.  

Маълум бўлишича, бу жиноятни Бухоро шаҳарида яшовчи 1992 йилда туғилган фуқаро содир этган. Aвтомобиль Бухоро шаҳар Гулшан кўчасида қолдириб кетилган.

“Ўша куни маст ҳолатда эдим. Ҳаво жуда совуқ бўлгани учун исиниб олиш мақсадида дуч келган бир машинага ўтирдим ва бошқариб кетдим. Машинани бироз ҳайдаганимдан сўнг, исиниб олгач, машинани кўчага ташлаб кетдим”, дейди гумонланувчи шахс.

Унга нисбатан Бухоро ИИБ томонидан Жиноят кодексининг 267-моддаси 1-қисми билан жиноят иши қўзғатилиб, ҳозирда дастлабки тергов ҳаракатлари олиб борилмоқда.

Динара Юсупова