Бухорода куёв қайнисини пичоқлаб қўйди

Бухоро вилояти Вобкент туманида яшовчи фуқаро спиртли ичимликлар истеъмол қилиб, қайни укасини пичоқлаб қўйди. Бу ҳақда Бухоро вилояти Ички ишлар бошқармаси матбуот хизмати хабар берди.

Қайд этилишича, жорий йилнинг 5 январь куни соат 22:00 ларда Вобкент тумани “Қурувчи” маҳалласида яшовчи П.А. спиртли ичимликдан маст бўлиб, қайни укаси билан оилавий келишмовчилик сабабли жанжаллашиб қолади. Юзага келган жанжал вақтида қўлидаги ошхона пичоғи билан қайни укасининг чап елка қисмига қасддан бир марта уриб, ҳаёт учун хавфли бўлган оғир шикаст етказади.

Мазкур ҳолат юзасидан туман ИИБ томонидан П.А.га нисбатан Жиноят кодексининг 104-моддаси 2-қисми билан жиноят иши қўзғатилиб, ҳозирда дастлабки тергов ҳаракатлари олиб борилмоқда.

Аввалроқ, Тошкентдаги новвойхоналардан бирида танишига олти марта пичоқ урган шахс 10 йилга озодликдан маҳрум қилингани ҳақида хабар берилган эди.

Озода Чориева