Британия АҚШнинг Исроил яқинидаги ҳарбий операцияларига қўшилмоқчи эмас – “Telegraph”

Буюк Британия ҳарбий кемалари АҚШ ҳарбий-денгиз кучларининг Исроил қирғоқлари яқинидаги операцияларига қўшилмайди. Бу ҳақда Британия қироллик денгиз флотидаги манбасига таяниб, “The Daily Telegraph” нашри хабар берди.

Сўзлари билвосита келтирилган нашр суҳбатдошига кўра, бундай режалар йўқ. Минтақада Қизил денгизда юк ташиш хавфсизлигини таъминлаш учун Prosperity Guardian операциясида иштирок этаётган Британиянинг HMS Diamond эсминеци, шунингдек, Арабистонда қурол ва гиёҳванд моддалар контрабандасига қарши кураш бўйича миссияларни бажарувчи HMS Lancaster фрегати жойлашган.

Кеча, 12 апрель куни эрталаб Пентагон Яқин Шарққа у ерда жойлашган Америка қўшинлари хавфсизлигини таъминлаш учун қўшимча кучлар юборилганини тасдиқлади. Оқ уй Миллий хавфсизлик кенгашининг стратегик алоқалар бўйича координатори Жон Кирбининг маълум қилишича, Қўшма Штатлар Суриядаги Эрон элчихонасининг консуллик бўлимига Исроилнинг яқинда уюштирган зарбасига Теҳроннинг жавоб беришга тайёрлиги ҳақидаги баёнотлари туфайли Яқин Шарқдаги ҳарбий иштирокини ўзгартирган.

Кеча, 12 апрель куни “The Wall Street Journal” Эроннинг жавоб зарбаси яқин 24-48 соат ичида амалга оширилиши мумкинлигини ёзди. Нашрнинг қайд этишича, яҳудий давлати Эроннинг шимолдан ёки жанубдан тўғридан-тўғри ҳужум қилишига ҳозирлик кўрмоқда. 

Манбага кўра, Теҳрон ҳали якуний қарорга келмаган. “Axios” портали эса Эрон Ташқи ишлар вазири Ҳусайн Амир Абдуллоҳиён германиялик мавқедоши Анналена Бербокка Теҳрон кескинликнинг кучайишига олиб келмаслик учун Исроил зарбасига чекланган тарзда жавоб беришини айтганини ёзди.