Бочеллининг вилласидан ярим млн евролик буюмлар ўғирлаб кетилди

Таниқли операчи Андреа Бочелли оиласининг Тосканадаги вилласидан ярим миллион евролик мулк ўғирланди. Жиноятчилар нақд пул, заргарлик буюмлари ва қимматбаҳо буюмларни тўнаб кетган. Бу ҳақда “Il Tirreno” хабар берди.

Маълум бўлишича, ушбу кўчмас мулк объекти таниқли Бочеллининг оиласига тегишли. Ўғрилик содир бўлган вақтда уй ичида ҳеч ким бўлмаган, бундан ташқари, вилла вақтинчалик америкалик сайёҳлар оиласига ижарага берилган бўлган.

Ҳуқуқ-тартибот идоралари ходимларининг фикрича, жиноятда профессионал ўғрилардан иборат гуруҳ иштирок этган. Улар ўз “ишини” тез ва мақсадли равишда амалга оширган.

Санъаткорнинг уйидан заргарлик буюмлари, қимматбаҳо соатлар, бренд сумкалар ва нақд пуллар ўғирланган – етказилган зарар миқдори 500 минг еврога баҳоланмоқда.

Қайд этилишича, объектда қўриқлаш хизмати уланмаган, сигнализация тизими эса ўчирилган ҳолатда бўлган. Ҳозирда тергов ҳаракатлари олиб борилмоқда.

Эслатиб ўтамиз, аввалроқ Италиянинг Неаполь шаҳрида қуролланган гуруҳ банк филиалини талон-торож қилиб, 25 кишини гаровга олганди ва ерости туннеллари орқали қочиб кетган эди.