Блинкен G7 даги мавқедошлари билан Россиядаги вазиятни муҳокама қилди 

АҚШ Давлат котиби Энтони Блинкен бугун, 24 июнь куни Россиядаги вазиятни G7 Ташқи ишлар вазирлари ва Европа Иттифоқи Ташқи сиёсати раҳбари Жозеп Боррель билан телефон орқали муҳокама қилди. Бу ҳақда Давлат департаменти матбуот хизмати раҳбари Мэтью Миллернинг музокаралар якунлари бўйича кенг тарқалган ёзма баёнотида маълум қилинди.

“Котиб Блинкен бугун Канада, Франция, Германия, Италия, Япония, Буюк Британия Ташқи ишлар вазирлари ва Европа Иттифоқининг Ташқи ишлар ва хавфсизлик сиёсати бўйича Олий вакили билан Россиядаги мавжуд вазиятни муҳокама қилиш учун [телефон] музокараларни ўтказди”, дейилади баёнотда.

Айтилишича, АҚШ вазият янада ривожланиши билан иттифоқдош ва ҳамкорлар билан яқин мувофиқлаштиришни давом эттиради. Шунинг учун ҳам Блинкен АҚШнинг Украинани қўллаб-қувватлаши ўзгармаслигини тасдиқлаган.

Россияда бўлаётган воқеалар 

Бугун, 24 июнь куни “Вагнер” жангчилари Ростовдаги Жанубий ҳарбий округ штаб-квартирасини эгаллаб олди. Москвада ҳам хавфсизлик чоралари кучайтирилди. Бунинг ортидан Россия Мудофаа вазирлиги “Вагнер” ҳужум отрядлари жангчиларига, мурожаат билан чиқди. Шунингдек, Ўзбекистоннинг Россия Федерациясидаги элчихонаси Россияда бўлиб турган фуқароларини огоҳлантирди. 

Шундай қизғин вазиятдан Рамзан Қодиров ҳам четда қолгани йўқ. У Чеченистон Республикаси Мудофаа вазирлиги ва Россия гвардияси жангчиларини кескинлик юзага келган зоналарга жўнатди.

Бу орада  Путин Беларусь, Қозоғистон, Ўзбекистон ва Туркия рахбарларига қўнғироқ қилди. У Қосим-Жомарт Тўқаев, Шавкат Мирзиёев, Александр Лукашенко ва Ражаб Тойиб Эрдўғанни Россиядаги  вазият ҳақида хабардор қилган. 

Путин билан суҳбатдан сўнг Қозоғистон Президенти матбуот хизмати баёнот бериб, Қосим-Жомарт Тўқаев давом этаётган воқеалар Россиянинг ички иши эканини айтганини билдирди.  Эрдўған эса Путиннинг ҳар қандай қадамларини қўллаб-қувватлашини билдирган.

Ўзбекистон Президентининг матбуот хизмати эса ўзаро сухбатда икки томонлама ва минтақавий кун тартибидаги долзарб масалалар муҳокама қилинганини ёзган.