Блинкен Алиев ва Пашинянга қўнғироқ қилди. Баку-Ереван муаммоси ҳал бўладими?

АҚШ Давлат котиби Энтони Блинкен бугун, 10 октябрь куни Озарбайжон Президенти Илҳом Алиев билан телефон суҳбатида Ереван ва Баку муаммони ҳал қилиш учун чоралар кўраётганини олқишлади. Бу ҳақда Давлат департаменти матбуот хизмати раҳбари Нед Прайс баёнотида айтилади. 

Ҳужжатда таъкидланганидек, Блинкен Озарбайжон ва Арманистон томонидан барқарор тинчлик келишувларига эришиш йўлидаги ижобий қадамлар, жумладан, Ташқи ишлар вазирлари вайетакчилар ўртасида яқинда ўтказилган тўғридан-тўғри музокаралар учун ўз миннатдорчилигини билдирган. Прайснинг айтишича, Блинкен Озарбайжоннинг 4 октябрь куни 17 ҳарбий асирнинг озод қилинишини мамнуният билан қабул қилган ва шунингдек, Президент Алиевни “тинчлик жараёнини қўллаб-қувватлаш” учун чоралар кўришни давом эттиришга чақирган. 

“Блинкен Қўшма Штатлар чегараларни аниқ белгилаш, транспорт алоқаларини таъминлаш, бедарак йўқолганларни аниқлаш ва қайтариш, маҳбусларни озод қилиш борасидаги ҳаракатларни қўллаб-қувватлашини тасдиқлади”, дейилади баёнотда. 

Давлат котиби Қорабоғ аҳолисининг ҳуқуқлари ва ҳимоясини муҳокама қилиш муҳимлигини, шунингдек, узоқ муддатли тинчликка эришишнинг ягона йўли сифатида ҳар икки томон ўт очишни тўхтатиш режимини сақлаб қолиш ва музокаралар йўли билан келишувга эришишга эътибор қаратиш зарурлигини таъкидлаган. 

Шунингдек, шу бугуннинг ўзида Блинкен, Арманистон Бош вазири Никол Пашинянга ҳам қўнғироқ қилган.  Томонлар Арманистон-Озарбайжон чегарасидаги вазиятни муҳокама қилган ҳамда Ереван ва Баку ўртасида тинчлик битимини ишлаб чиқиш муҳимлиги ҳақида келишиб олган.  

“Суҳбатдошлар БМТ Низоми ва 1991 йилдаги Олмаота декларацияси асосида Арманистон ва Озарбайжон ўртасида тинчлик шартномасини ишлаб чиқиш, шунингдек, чегарани демаркация қилиш ва Арманистон-Озарбайжон чегарасида Европа Иттифоқи фуқаролик миссияси фаолиятини таъминлаш бўйича ишларни амалга ошириш муҳимлигини таъкидладилар”, Арманистон Вазирлар Маҳкамаси хабарида. 

Арманистон ҳукумати матбуот хизмати Пашинян Америка томонининг Озарбайжон Қуролли кучлари томонидан 13-14 сентябрь кунлари Арманистон суверен ҳудудида амалга оширилган агрессия оқибатларини бартараф этишга қаратилган саъй-ҳаракатларини юқори баҳолаганини таъкидлаган.

“Томонлар Озарбайжон Қуролли кучларини Арманистон суверен ҳудудидан олиб чиқиб кетиш ва ўт очишни тўхтатиш режимига сўзсиз риоя қилиш зарурлигини таъкидладилар. Тоғли Қорабоғ арманларининг хавфсизлиги ва ҳуқуқларини ҳимоя қилиш, Степанакерт ва Баку ўртасида музокаралар ўтказиш учун халқаро механизм яратиш, Озарбайжонда сақланаётган арман ҳарбий асирларни қайтариш масалалари муҳокама қилинди”, дейилади расмий Ереван хабарида.

Тинчлик келишуви

6 октябрь куни Озарбайжон Президенти Илҳом Алиев Чехия пойтахти Прагада Европа сиёсий ҳамжамиятининг биринчи саммити доирасида Франция Президенти Эммануэль Макрон ва Европа кенгаши раиси Шарль Мишель иштирокида Арманистон Бош вазири Никол Пашинян билан учрашди.

Учрашувда Европа Иттифоқи Озарбайжон билан чегарасини делимитация қилишда ёрдам бериш учун Арманистонга миссия юборишига келишилди.Шунингдек, учрашувдан кейин Арманистон октябрь ойи охирида Брюсселда Озарбайжон билан давлат чегарасини делимитация қилиш бўйича комиссия йиғилиши ўтказилишини маълум қилди.

Илҳом Алиевнинг айтишича, Баку ва Ереван ўртасида тинчлик шартномаси шу йил охиригача имзоланиши мумкин. Унинг сўзларига кўра, келишув бўйича ташаббуслар осонлик билан олға силжаётгани йўқ, бироқ келишувга умид бор.