Бир гуруҳ фазогирлар космонавтика кунини Ўзбекистонда нишонламоқда

Жорий йилнинг 12 апрель куни Россия Давлат Думасининг мудофаа бўйича қўмитаси раиси, Россия Қаҳрамонлар Ассоциацияси президенти, Россия Қаҳрамони,  генерал Владимир Шаманов бошчилигидаги Россия делегацияси Сирдарёда бўлди.

Делегация таркибида  бир неча космонавт-учувчилар, хусусан, асли ўзбекистонлик, афсонавий фазогир Владимир Жонибеков, ўзбек ўғлони Солижон Шарипов ҳам бор.

Россиялик меҳмонлар Сирдарё вилояти остонасидаги “Чеҳра” ресторан-мажмуасида кутиб олинди. Нон-туз таомилидан сўнг улар ўз қўллари билан сумалак  қозони қопқоғини очишди ва муъжизавий баҳор таомидан татиб кўришди. Шу ерда фолкьлор ансамбллари чиқишлари, ўзбек ошхонаси неъматлари ва бошқа миллий руҳдаги кўргазмалар намойиш этилди.

Ўз навбатида генерал Шаманов болалар бадиий ҳаваскорлик ансамбли иштирокчиларини Россия шоколадлари билан сийлади.

Тантанада йиллар давомида унутилмай келинаётган ҳарбий ва дўстлик мавзуидаги қўшиқлар ижро этилди.

Россия Қаҳрамони Владимир Шаманов Сирдарё ва унга туташ Чиноз ерларида кўп бора бўлганлигини, бу жойлар унга ёшлигидан қадрдон гўша эканлигини айтди.

Табдирда Сирдарё вилояти ҳокими Ғофуржон Мирзаев иштирок этди ва сўзга чиқди.