Bilimli qiz butun mamlakat kelajagini o‘zgartirishga qodir – Saida Mirziyoyeva

Bilimli qiz nafaqat o‘z hayotini, balki oilasini, atrofidagi muhitni va butun mamlakat kelajagini o‘zgartirishga qodir. Bu haqda O‘zbekiston Prezidenti Administratsiyasi rahbari Saida Mirziyoyeva o‘zining Telegram-kanalida yozdi.

Saida Mirziyoyevaning yozishicha, bugungi kunda O‘zbekiston oliy ta’lim muassasalarida 1,5 milliondan ziyod talaba tahsil olmoqda va ularning yarmidan ko‘pini qizlar tashkil etadi. Bu mamlakat Prezidenti tashabbusi bilan ta’lim sohasida amalga oshirilayotgan islohotlar natijasi.

“Qiz farzandining ilm olishiga ishongan minglab oilalar... O‘zi qiziqqan kasbni tanlayotgan minglab qizlar... Ular o‘qimoqda, izlanmoqda, bu qizlarning o‘ziga bo‘lgan ishonchi hamda shijoati kun sayin ortib bormoqda. Bilimli qiz nafaqat o‘z hayotini, balki oilasini, atrofidagi muhitni va butun mamlakat kelajagini o‘zgartirishga qodir”, deydi Prezident Administratsiyasi rahbari.

Shuningdek, Saida Mirziyoyeva ta’lim insonga hayot yo‘lini mustaqil tanlashda kuch va erkinlik baxsh etishini qayd etib, qizlarga orzulari sari dadil qadam tashlashlari uchun imkon berishga chaqirgan.