Belarusdan Litvaga dron uchirildi

Belarusdan Litvaga noma’lum turdagi dron uchib keldi. U taxminan 200 metr balandlikda kuzatilgan va oxirgi marta Vilnyus yaqinida ko‘rilgan. Bu haqda bugun, 28 iyul kuni Inqirozlarni boshqarish milliy markazi xabar berdi.

“Politsiya barcha kuchlarni safarbar etdi, barcha xizmatlar xabardor qilindi. Dronni payqagan aholiga zudlik bilan 112 raqamiga qo‘ng‘iroq qilish va hech qanday holatda unga yaqinlashmaslik tavsiya etiladi. Bu qanday dron ekani noma’lum, qo‘shimcha ma’lumot taqdim etiladi”, deyiladi markaz bayonotida.

Ijtimoiy tarmoqlarda uchuvchisiz samolyotning fotosuratlari va videolari e’lon qilindi, ular Rossiya armiyasi tomonidan Ukrainaga qarshi urushda Ukraina Qurolli kuchlari havo hujumidan mudofaa tizimlariga bosimni kuchaytirish uchun foydalanilgan Rossiyaning “Gerbera” droni bo‘lishi mumkin. Oxirgi ma’lumotlarga ko‘ra, uchuvchisiz samolyot Vilnyus ustidan uchib o‘tgan va shimoli-g‘arbga, Ukmerge shahri tomon uchmoqda.

“Uni qidirishga barcha politsiya kuchlari va boshqa xizmatlar jalb qilingan”, dedi Litva politsiya departamenti vakili Revita Yanavichyute ELTA agentligiga.

Litva Mudofaa vaziri Dovile Shakalene Belarusdagi harbiy mashg‘ulotlarga tayyorgarlik ko‘rilayotganiga ishora qildi. Uning so‘zlariga ko‘ra, bu bilan bog‘liq holda “har qanday hodisalar, jumladan, tasodifiy hodisalar ehtimoli” ortadi.

“Men hozirgina Ichki ishlar vaziri va armiya qo‘mondoni bilan gaplashdim, ma’lumotlarga aniqlik kiritilmoqda. E’tibor bering, bugungi kunda ob-havo sharlar uchun qulay, kontrabandachilar o‘z yuklarini yetkazib berishda foydalanadi”, dedi Shakalene LRT radiosida.

Litvaning havo harakatini boshqarish operatori Oro navigacija xabar berishicha, Litvada uchuvchisiz samolyot tufayli havo qatnovi to‘xtatilmagan.

“Parvozlar odatdagidek davom etmoqda”, deydi Ingridi Daugirde.

Xuddi shunday hodisa 10 iyul kuni ham sodir bo‘lib, ko‘rinishidan Shahed hujumchi droniga o‘xshash “Gerbera” droni Belarusdan Litvaga uchib kelgan. Litva rasmiylari tergov olib bormoqda.