“Барселона” ушбу ёзда сотиб олиши керак бўлган 4 суперфутболчи

Каталониянинг “Барселона” клуби ушбу ёзги трансферлар вақтида қайси футболчиларни ўз таркибига қўшиб олиши керак? Айни пайтда кўплаб нашрлар бу борада турлича фикрларни тақдим қилмоқда.

Биз эса кейинги мавсумда “Барселона” клубига катта ёрдам бера олиши мумкин бўлган 4 футболчи ҳақида суҳбатлашмоқчимиз.

“Барселона”нинг асосий рақиби Мадриднинг “Реал” клуби жорий трансферлар вақтида жуда фаол ҳаракат қилмоқда. Зидан кейинги мавсумда яна жамоани тахтга қайтариш учун ўзига керак бўладиган футболчиларнинг асосий қисмини “Сантиаго Бернабэу”да тўплаб улгурди. Аммо қарши томон “Барселона” ўтган мавсум охирида ачинарли омадсизликка учраган бўлсада ҳозирча трансферларга қўл урмаяпти.

Бу ҳолатни хориж ОАВ ҳозирча бўрон олди сокинлиги деб атамоқда. Уларнинг фикрича “Барселона” аллақачон суперфутболчилар билан келишиб олган ва “бомбани портлатиш” учун қулай пайт кутмоқда.

Нима бўлганда ҳам каталонлар сафига келиши керак бўлган футболчилар жамоанинг ҳозирги ҳолатига мос келиши керак. Бизнингча қуйидаги 4 футболчи айни дамда “Барселона”ни аввалги енгилмас даражасига олиб чиқа олади.

Неймар

Биринчи навбатда, жамоага собиқ футболчи Неймар қайтарилиши керак. У Каталонияни тарк этганидан бери “Барса”нинг ҳужумдаги чап қаноти бироз оқсамоқда. Дембеле икки йил давомида Неймар даражасига чиқа олмади. Бир пайтлар МСН (Месси, Суарес, Неймар) триоси ҳар қандай рақиб ҳимоясини ортиқча қийинчиликсиз янчиб ташлар эди. Шу сабабга кўра раҳбарият Неймарнинг Париждаги бахтсизлигидан фойдаланиб, ўзлари учун фойдали трансферга қўл уриши мумкин.

Эслатиб ўтамиз, бразилиялик футболчи 2017 йилда “Барселона”ни тарк этиб, ПСЖ сафига бориб қўшилган эди. 2 мавсум Парижда ўйнаган футболчи ортга қайтишни хоҳламоқда. Каталонлар футболчи учун 100 млн евро ва Коутиньони бермоқчи.

Антуан Гризманн

Иккинчи навбатда “Атлетико” ҳужумчиси Антуан Гризманн билан шартнома имзоланади. Каталонияликлар футболчининг трансферини эълон қилиш учун 1 июль санасини кутмоқда. Шу куни футболчининг шартномасида кўрсатилган товон пули 120 млн еврога тушади. Бу футболчи айни пайтда ёши ўтиб бораётган Суарес учун муҳим ўринбосар деб ҳисобланмоқда. 

Гризманнинг фойдали жиҳати шундаки, тўпурар Месси ҳужумнинг олдинги чизиғига ўтказиладиган бўлса ҳам у бемалол ўнг қанотга ортиқча қийинчиликларсиз мослашиб кета олади.

Адриен Рабьо

Жамоага қўшилиши керак бўлган учинчи футболчи Адриен Рабьо. ОАВда тарқалган хабарларга кўра франциялик футболчи январ ойидаёқ “Барселона” билан келишиб олган. “Кўк-анорранлилар” учун плюс жиҳат шундаки, ярим ҳимоячи Каталонияга эркин агент сифатида кўчиб ўтади.

Бу футболчи январь ойидан буён асосий жамоада ўйин амалиётисиз қолиб кетган эсада, аммо ПСЖнинг ўринбосарлар таркибида ўз формасини ушлаб тура олди. 24 ёшли француз 33 ёшли Ракитичнинг ўрнига сотиб олиниши керак. Рабьо ярим ҳимояда ҳимояланиш ва ҳужумга ўтишдаги стабилликни ушлай оладиганлар тоифасидан. 

Матиас де Лигт

Тўртинчи футболчи голландиялик ҳимоячи Матиас де Лигт. “Аякс” футболчисига жуда кўп гранд клублар қизиқиш билдираётган бўлсада, де Лигт “Барселона” билан шартнома имзолаши бироз ҳақиқатга яқинроқ. Футболчининг агенти ПСЖ, МЮ каби кўпроқ пул таклиф қилаётган жамоалар билан шартнома имзолашга ҳаракат қилганди, аммо Матиас кўпроқ соврин ютадиган жамоада тўп суришни хоҳлаяпти.

Шу сабабдан, Каталония клуби унга жуда муносиб. Қолаверса, “Барселона”да Пике борган сари ёши “пенсия”га яқинлашаётган бўлса, Умтити ўтган йилги жароҳатидан кейин ўз савиясига чиқа олмаяпти. Лангле эса тўла даражадаги топ футболчи эмас. Бунга кўра, де Лигт “Барселона” учун энг мақбул номзод. Унинг трансфер қиймати бўлган 75 млн евро масаласига келадиган бўлсак, жамоада кераксиз бўлган бир нечта футболчини сотиш орқали буни топиш қийин эмас.

“Барселона” юқоридаги футболчиларни харид қилиш учун тахминан 300 млн евро ишлатиши керак. Маълум бўлишича, ҳозирда клуб ҳисобида трансферлар учун 200 млн бор. Қолган маблағ футболчиларни сотиш орқали топилиши кутилмоқда. Клуб Умтити, Ракитич, Силессонларнинг трансферидан 150 млн ишлаб олиш имкониятини кўриб чиқмоқда. 

Шунингдек Гризманн ва Неймар жамоага қўшиладиган бўлса Усмон Дембеле ҳам трансферга қўйилиши мумкин. Агар шундай қилинса, жамоанинг молиявий ҳолати ҳам бир маромга тушиб олади.