“Барса” Холанд трансфери ўхшамаса, “кичик Златан” билан шартнома имзолайди

“Барселона” Дортмунднинг "Боруссия" клуби ҳужумчиси Эрлинг Холанд билан шартнома имзолай олмаса, унинг ўрнига муқобил вариант борасида қарор қабул қилди. Испан нашрлари хабарига кўра, “Реал Сосьедад” ҳужумчиси Александр Исак “кўк анорранглилар” учун муқобил вариант сифатида қаралмоқда. 

“Барса” футболчини бир неча ой кузатиб борди. Шунингдек, швед ҳужумчисининг ўзи ҳам Каталония клубида ўйнашни истамоқда. Исак “Реал Сосьедад” шарафини 2019 йилнинг ёзидан бери ҳимоя қилиб келади. Футболчининг клуб билан шартномаси 2026 йилнинг июнига қадар мўлжалланган.

“Тransfermarkt” портали Исакни 40 миллион еврога баҳоламоқда. Испания чемпионатининг жорий мавсумида 22 ёшли ҳужумчи 19 та ўйинда майдонга тушиб, 4 та гол ва битта голли узатмани амалга оширди.

Маълумот учун, Исак Швеция терма жамоасининг асосий фигураларидан бири ҳисобланади. Златан Ибрагимович терма жамоадан кетгач, унинг ўрнида айнан Александр муносиб ҳаракат қилиб келмоқда.

Шахбоз Қаҳҳоров