Банк кассаларининг иш тартибига ўзгартириш киритилди

Жамият 3706
image

Ўзбекистондаги банк кассаларининг иш тартиби ўзгартирилди. Бу ҳақда Марказий банк бошқарувининг 22 октябрь куни қабул қилинган “Тижорат банкларида касса ишини ташкил этиш, нақд пул ва бошқа қимматликларни инкассация қилишга доир йўриқномага ўзгартириш ва қўшимчалар киритиш ҳақида”ги қарорида сўз боради.

“Norma.uz”нинг ёзишича"Ўзбекистон Республикасининг Марказий банки тўғрисида"ги ҳамда "Банклар ва банк фаолияти тўғрисида"ги қонунларига мувофиқ Йўриқномага қуйидаги ўзгартиришлар ва қўшимчалар киритилмоқда.

Маълумотларга кўра, қонунларга иккита тушунча киритилмоқда:

банк (филиал) биносидан ташқарида ташкил этилган кассалар – мини банк кассаси, банк хизматлари офиси кассаси, махсус касса ва бошқа барча турдаги кассалар;

инкассация хизмати – хўжалик юритувчи субъектлар, шунингдек банклар, банкларнинг филиаллари ва алоҳида бўлинмаларига тегишли бўлган нақд пул ва бошқа қимматликларни инкассация қилиш, ташиш ҳамда кузатиб бориш хизмати.

“Банк (филиал) биносида ва бинодан ташқарида ташкил этилган кассаларни қурилиши, зарурий асбоб-ускуналар билан жиҳозланишини тартибга солувчи соддалаштирилган тартиб-таомиллар тўлдирилди”, дейилади хабарда.

Хусусан, қуйидагилар учун асослар шартланмоқда:

- касса очилиши тўғрисидаги қарор;
- қимматли қоғозлар, кафолат ва кафилликлар ҳамда гаров сифатида, суғурта - полисларининг қабул қилиб олиниши тартиби;
- штатлар жадвали;
- мижозлар сони;
- хизматлар турлари;
- хавфсизликни таъминлаш ва бошқалар.

Таъкидланишича, банк кассалари, уларнинг фаолияти устидан масофадан туриб кунлик назорат ўрнатилган ҳолда, исталган ҳудудда ташкил этилиши мумкин.

Бундан ташқари, хўжалик юритувчи субъектлар биноларида банк (филиал) билан тузилган шартномага асосан кассалар ташкил қилинади. Банк кассаси томонидан тақдим этиладиган хизмат турлари шартномада келишиб олинади.

Шунингдек, касса китоблари, касса журналлари, бланклар ва варақаларни расмийлаштириш ҳамда тасдиқлаш ишлари электрон шаклда ҳам йўлга қўйилиши мумкин.  Бунинг учун дастурий маҳсулотлар билан ишловчи моддий жавобгар шахс биометрик тарзда идентификация қилиниши керак. 

“Шунингдек, бошқа ўзгартиришлар ва қўшимчалар ҳам назарда тутилган”, дейилади хабарда.

Маълумот ўрнида, ҳужжат Қонун ҳужжатлари маълумотлари миллий базасида эълон қилинган ва 22 октябрдан кучга кирди.

Сарвар Анвар ўғли
Мақолага баҳо беринг
Баҳолаганлар: 49
Рейтинг: 3
t
×