Бакуда Ўзбекистон маданият кунлари старт олди (фоторепортаж)

Озарбайжоннинг Баку шаҳрида Ўзбекистон маданияти кунларининг очилиш маросими ва қўшма концерт дастури бўлиб ўтди.

Икки мамлакат раҳбарлари Шавкат Мирзиёев ва Илҳом Алиев учрашувида амалга оширилган келишувлар доирасида жорий йилнинг 1 август куни Озарбайжон Республикасининг Баку шаҳрида Ўзбекистон маданияти кунлари бошланди.

1 август оқшомида маданият кунларининг очилиш маросими бўлиб ўтди. Маросимни кириш сўзи билан очган Озарбайжон Республикаси маданият вазири Одил Каримли ушбу тарихий кун икки мамлакатлар маданий алоқалари ривожи учун янги саҳифа эканини таъкидлаб, маданий ҳафталик ишига муваффақият тилади.

Ўзбекистон Республикаси Маданият вазири Озодбек Назарабеков қардош халқлар ўртасидаги кўп векторли алоқалар, айниқса, сўнгги йилларда янада мустаҳкамланиб, янги босқичга чиққанини таъкидлади. Маданият, санъат ва адабиёт борасидаги тарихий яқинлик икки халқнинг азалдан бир-бирига уйғун ривожланганини алоҳида эътироф этди.

Шундан сўнг муҳташам саройда ўзбекистонлик ва озарбайжонлик санъат усталари иштирокида қўшма концерт бўлиб ўтди.

Концерт дастурида Ўзбекистонда хизмат кўрсатган артист Камолиддин Ўринбоев бошчилигидаги Ўзбекистон давлат симфоник оркестри, шунингдек Ўзбекистон халқ артистлари Фарруҳ Зокиров, Насиба Абдуллаева, Самандар Алимов, Гулсанам Мамазоитова, Женисбек Пиязов, Ўзбекистонда хизмат кўрсатган артистлар Илёс Арабов, Юлдуз Турдиева, хонандалар Озода Нурсаидова ва Озарбайжон халқ артисти Гуляноқ Мамедова иштирок этди.