Австрия, Чехия ва Словакияда Hipp болалар овқатида каламуш заҳари аниқланди

Австриянинг Бургенланд федерал ерида полиция Hipp компаниясига тегишли болалар овқати банкасидан каламуш заҳарини топди. Бу ҳақда “Reuters” хабар берди.

Жорий ҳафтада Бургенланддаги Spar дўконларида “сабзи-картошка” номли Hipp болалар овқати банкаларининг ёрлиғи шикастланган ҳолатда аниқланган. Банкалардан ёқимсиз ҳид келган, қопқоқлари очилган ва муҳрлари олиб ташланган. Бундан ташқари, банкаларнинг пастки қисмида қизил доира туширилган стикерлар ҳам топилган.

Ўтказилган лаборатория текшируви болалар овқати таркибида каламуш заҳари борлигини тасдиқлаган. Чехия ва Словакия полицияси ҳам худди шундай белгилар қўйилган банкаларни мусодара қилган ва уларда ҳам заҳар аниқланган.

Шу сабабли Hipp компанияси Австриядаги мингдан ортиқ Spar дўконларидан болалар маҳсулотларини қайтариб олган. Чехия ва Словакияда ҳам бу маҳсулотлар савдодан олиб ташланган. Компания огоҳлантиришича, шикастланган банкалардаги маҳсулотни истеъмол қилиш ҳаёт учун хавфли.

“Spiegel Panorama” нашрига кўра, Бавария полицияси ушбу ҳолат юзасидан тергов бошлаган. Болалар овқатини заҳарлашга алоқадор бир ёки бир нечта шахс қидирилмоқда. Ҳозирча Германияда заҳар топилган банкалар ҳақида хабар берилмаган.

Эслатиб ўтамиз, жорий йилнинг январь ойида Ўзбекистонда ҳам Nestle компаниясининг айрим болалар овқатлари таркибида токсин аниқлангани сабабли уларнинг савдоси вақтинча тўхтатилган. Текширув давомида ташқи етказиб берувчидан олинган хомашёда овқатдан заҳарланишга ўхшаш аломатларни келтириб чиқарувчи сереулид токсини борлиги аниқланган.